काठमाडौं । कक्षा १२ को प्रश्नपत्र आउट गरेको आरोपमा काठमाडौंबाट चार जना पक्राउ परेका छन् ।
काठमाडौं महानगरपालिका–६ मा रहेको वेलकम पार्टी प्यालेसको हलमा अनाधिकृत रुपमा परीक्षा दिएको पाइएपछि प्रहरीले उत्तरपुस्तिका सहित पक्राउ गरेको हो ।
पक्राउ पर्नेमा काठमाडौंको कामनपा–६ सरस्वतीनगर कपन बस्ने वर्ष ३८ को माधव त्रिपाठी, दक्षिणकाली नगरपालिका –८ बस्ने वर्ष १९ को सबिन पौडेल, कागेश्वरी मनहरा बस्ने वर्ष २० को सितेश कुमार यादव र कागेश्वरी थली बस्ने बस्ने वर्ष २३ को रोशन रानाभाट रहेका जिल्ला प्रहरी परिसर काठमाडौंले जनाएको छ ।
वैशाख २६ गते बिहान ८ देखि १० बजेसम्म कक्षा १२ को कम्प्युटर साइन्स को परीक्षा चलिरहेको समयमा उक्त विषयको प्रश्नपत्र आउट गरी शंकास्पद रुपमा प्रश्नपत्र हल गरिरहेको अवस्थामा उनीहरु भेटिएका थिए ।
राष्ट्रिय परीक्षा बोर्ड, परीक्षा नियन्त्रण कार्यालयबाट जारी भएको मूल उत्तर पुस्तिकामा सम्बन्धित विषयको नै उत्तर हल गरिरहेको प्रहरीको आरोप छ ।
उनीहरुमाथि शिक्षा ऐन, २०२८ बमोजिम जिल्ला प्रहरी परिसर, काठमाडौंबाट थप गरी अनुसन्धान भई रहेको छ।
