महेन्द्रनगर । कञ्चनपुरको महेन्द्रनगरमा रहेको महाकाली अस्पतालमा अख्तियार दुरुपयोग अनुसन्धान आयागले छापा मारेको छ । बिहीबार छापा हानेको अख्तियारले अस्पतालद्वारा हालै खरिद गरिएका भेन्टिलेटरलगायतका स्वास्थ्य उपकरण सम्बन्धी कागजात नियन्त्रणमा लिएको छ ।
अस्पतालले नयाँ सामानका लागि टेन्डर गरी पुरानो सामान भित्तयाएपछि विवाद हुँदै आएको छ ।स्वास्थ्य सामाग्री खरिदमा अनियमितता भएको हुने सक्ने भन्दै अख्तियार दुरुपयोग अनुसन्धान आयोगले अस्पतालबाट कागजात नियन्त्रणमा लिएको छ । भेन्टिलेटर लगायतका स्वास्थ्य उपकरण तथा सामाग्री खरिद प्रक्रियामा अनियमितता भएको हुनसक्ने भन्दै अस्पताल प्रशासनबाट कागजात नियन्त्रणमा लिएको अख्तियार दुरुपयोग अनुसन्धान आयोग कञ्चनपुर कार्यालयले जनाएको छ ।
सुदूरपश्चिम प्रदेशको सामाजिक विकास मन्त्रालयले कोरोना भाइरस (कोभिड–१९) रोकथामका लागि छुट्याएको बजेटबाट अस्पतालको आइसियू सञ्चालनका लागि भेन्टिलेटर, बल्ड ग्यास एनालाइजर, डिफिब्रिलेटर तथा मोनिटर किनेका थियो। महाकाली अस्पतालले चैत्र १६ गते सूचना जारी गर्दै भेन्टिलेटर सहित पाँच उपकरण आपुर्तिका लागि प्रस्ताव पेश गर्न आह्वान गरेको थियो ।
चैत्र २७ गते आरजी सप्लायर्स प्रालिले ५३ लाख रुपैयाँमा एक थान भेन्टिलेटर, मनिटर लगायतका उपकरण आपुर्तिका लागि ठेक्का पाएको थियो। सोही कम्पनीले चैत्र अन्तिम साता अस्पतालमा भेन्टिलेटर पुर्याएको थियो । भेन्टिलेटर अस्पतालमा जडान गर्ने क्रममा पुरानो तथा प्रयोग गरिएको भेटिएको थियो ।
भेन्टिलेटर पुरानो भएको प्राविधिकको ठहर
सुदूरपश्चिम प्रदेशको सामाजिक विकास मन्त्रालयका बायोमेडिकल इन्जिनियर हरेन्द्र चटौत नेतृत्वको प्रावधिक टोलीले भेन्टिलेटर पुरानो भएको भन्दै त्यसमा १० वटा खोट औँल्याएको थियो ।
चटौत नेतृत्वको टोलीले भेन्टिलेटर २०१५ डिसेम्बरमा बनेको, ट्रलीबाट ह्विल्ससम्म खिया लागेको, अक्सिजन पाइपमा खिया लागेको, देब्रे पट्टीको भागमा ७ र ८ सेन्टिमिटर कालो दाग, एक घन्टा ब्याकअप दिने ब्याट्री नभएको, डिस्प्ले र नोभ फोहर अवस्थामा रहेको, सफ्टवेयर अनुरुप फिलिप्स कम्पनीको भेन्टिलेटर दुई घन्टा चलेको, क्यालिब्रेसन नगरेको र स्पेसिफिकेसन अनुरुप भेन्टिलेटरका अन्य एसेसिरिज नभएको प्रतिवेदनमा उल्लेख गरेको छ ।
व्यवस्थापनलाई जानकारी नदिई भित्र्याइयो
यता, महाकाली अस्पताल व्यवस्थापन समितिले भेन्टिलेटर सहितका उपकरण खरिद सम्झौताविना अस्पताल ल्याइएको अस्पताल व्यवस्थापन समितिले जनाएको छ । अस्पताल व्यवस्थापन समितिले बुधबार प्रेस विज्ञप्ति जारी गर्दै अस्पताल प्रशासनले व्यवस्थापन समितिसँग दूरी कायम राख्न खोजेको आरोप लगाएको थियो ।
‘टेण्डर स्वीकृतिको प्रकृया महाकाली अस्पताल खरिद ईकाई तथा मूल्यांकन समितिको हुने भएकाले टेण्डर स्वीकृति सम्बन्धी जानकारी व्यवस्थापन समितिलाई नभएको र खरिद सम्झौताविना अस्पतालमा भेन्टिलेटर लगायत उपकरण र सामाग्री खरिद गरिएको कार्यले अस्पताल प्रशासनले व्यवस्थापनसँग दुरी कायम राख्न खोजेको आभाष भएको छ।’
व्यवस्थापन समिति अध्यक्ष कृष्णदत्त जोशी (बोक्सर), सदस्यहरु कृष्णानन्द भट्ट, कौशल्या ओझा, हरीराम चौधरीद्वारा हस्ताक्षरित विज्ञप्तीमा भनिएको छ ।
यता, अस्पतालका मेडिकल सुपरिडेन्टेन डा. हरिकुमार श्रेष्ठले भेन्टिलेटरसहित उपकरण अस्पतालमा आइपुगे पनि आफूले नबुझेको दाबी गरेका छन् । अस्पतालले माग गरे बमोजिम आए नआएको दुरुस्त गरेर मात्रै आफूहरुले सामाग्री बुझ्ने उनले बताएका थिए ।
