काठमाडौं । नेपाल उद्योग वाणिज्य महासंघ र मलेसियास्थित नेशनल चेम्बर अफ कमर्स एण्ड इन्डस्ट्रीबीच व्यापार तथा लगानी प्रवद्र्धन गर्ने उद्देश्यले द्विपक्षीय सम्झौतामा हस्ताक्षर भएको छ ।
तेस्रो लगानी सम्मेलनको उद्घाटन सत्रपछि आज यहाँ हस्ताक्षर समारोह भएको हो ।
समझदारीपत्रमा एफएनसीसीआईका अध्यक्ष चन्द्रप्रसाद ढकाल र मलेसियाको राष्ट्रिय चेम्बर अफ कमर्स एन्ड इन्डस्ट्री (एनसीसीआईएम)का अध्यक्ष तान श्री दातो सोह थियान लाइले आ–आफ्नो तर्फबाट हस्ताक्षर गरेका छन् ।
त्यसैगरी नेपाल र भारतका दुई व्यवसायिक संस्थाबीच डाटा सेन्टर स्थापना र सञ्चालनका लागि सहयोग सम्झौता भएको छ । बीएलसी ग्रुप नेपाल र भारतको योटा डाटा सर्भिसेज प्राइभेट लिमिटेडबीच यस सम्बन्धमा सम्झौता भएको छ ।
सम्झौतामा बीएलसी ग्रुपका प्रबन्ध निर्देशक मेघा चौधरी र योटाका प्रमुख कार्यकारी अधिकृत सुनिल गुप्ताले आ–आफ्नो संस्थाको तर्फबाट हस्ताक्षर गरेका छन् ।
