काठमाडौं । लकडाउनका कारण खान बस्न समस्या परेपछि हजारौं नागरिक बालबच्चासहित सयौं किलोमिटरको दूरी पैदलै हिँडिरहेका छन् । तर, सरकारले उनीहरुलाई वेवास्ता मात्रै गरेको छैन, बरु दुःख दिने काम गरेको छ ।
यतिबेला सामाजिक सञ्जालमा देशका विभिन्न भागमा पुग्न पैदलै हिँडिरहेका विभिन्न समूहहरुका तस्विर राखेर धेरैले सरकारसँग जवाफ खोजिरहेका छन् । तर, सरकार न मजदुरहरुलाई खाने बस्ने व्यवस्था मिलाउँछ न त उनीहरुलाई गन्तव्यमा पुर्याउन नै मद्दत गर्छ । बरु सरकारले लकडाउन अझ कडा पार्ने पैदल हिँड्नेहरुलाई पक्राउ गर्ने धम्की दिइरहेको छ ।
सडकमा हिँड्दा कतिपय मनकारीहरुले चिउरा, चाउचाउ खान दिएपनि कयौं जनप्रतिनिधि र तहहरु पार गरिरहँदा उनीहरुले एक बोत्तल पानी दिने त के, अछुतको जस्तो व्यवबहार गरिरहेका छन् । तीनै तहका सरकारको यो व्यवहारप्रति सामाजिक सञ्जालमा तिखो प्रहार भइरहेको छ ।
यसै विषयमा परशुराम लामिछानेले फेसबुकमा लेख्नुभएको छः ‘१० महिनाको बच्चा काखमा, ४ व र्षकी छोरी डोर्याउँदै उनी पतिसँग दिल्लीबाट भैरहवा नाकामा आउन ८ दिन लागेछ । काठमाडौं बस्न नसकेपछी आफ्नै घर दाङ हिडेको १० जनाको यो टोलीलाई ७ दिन लाग्यो । काठमाडौंबाटै बर्दिया राजापुर हिँडेको र्को यो टोलीलाई पसिना चुहाउँदै कोहलपुर आउन ८ दिन लाग्यो ।
बाटोमा थुप्रै जनप्रतिनिधिहरु छिचोल्दै, राज्यका ढुकुटीबाट दौडेका सुरक्षाकर्मीका गाडीबाट अझै त्रास बोक्दै तीन ओटा मुख्यमन्त्री बस्ने राजधानी टेकेर आउँदासम्म उनीहरुको पसिना र आसुले रानिपोखरी भरियो तर कसैले एक बोतल पानी खान दिएनन् । बरु छोइन्छ कि भन्दै कोही अगाडि पर्न चाहेनन् ।
यस्तो दर्दनाक अवस्थामा एक हप्ता भनेर गरेको लकडाउन ले ३ हप्ता पुर्याएपछी कसैसँग खाने पैसा पुगेन र उनीहरु कमिज खोलेर टाउकोमा बाँधेर हिड्न तयार भए ।
यस्तो दुःखको बेला जनतालाइ हेर्दैन भने त्यो सरकार जनताको निम्ति कहिले उत्तरदायी बन्ने ? प्रश्न बारम्बार उठ्छ । ती जनताको भोट गनेर आएका कथित जनप्रतिनिधि र त्यो तीन तहको सरकारले जनताको निम्ति कस्तो अवस्थामा काम गर्छ त ?’
