महेन्द्रनगर। कञ्चनपुर कारागारका कैदीबन्दीले आफ्नो गास काटेर विपत्तिमा परेकालाई राहत सहयोग गरेका छन् । कारागारमा रहेका ३ सय १६ जना कैदीबन्दीहरुले आफ्नो एक छाक खाना कटाई ८ क्विन्टल चामल तथा १ बोरी नुन राहत सहयोग गरेका हुन् ।
मंगलबार कञ्चनपुरका प्रमुख जिल्ला अधिकारी नुरहरी खतिवडालाई उनीहरुले सो सहयोगको खाद्यान्न हस्तान्तरण गरे । लकडाउनका कारण भोकै बस्न बाध्य मजदूर तथा विपन्न परिवारका लागि आफ्नो गास कटाएर सहयोग गरेको कैदीबन्दीले जनाएका छन् ।
खाद्यान्न ग्रहण गर्दै पूमुख जिल्ला अधिकारी खतिवडाले कैदीबन्दीले आफूले एकछाक खाना कटौती गरेर जम्मा गरी जोखिममा रहेकाहरुलाई सहयोग गर्ने भावना सह्रानीय भएको भन्दै त्यसको उचित वितरण गर्ने बताउनुभयो ।
९५ जना बस्न मिल्ने क्षमता रहेको कञ्चनपुर कारागारमा झण्डै तेब्बर कैदीबन्दी रहेका छन् । जसमा २ नाबालकसहित १८ जना महिला तथा २ सय ९८ पुरुष रहेका छन् । क्षमता भन्दा बढी कैदीबन्दी रहेका कारण विभिन्न समस्या झेल्नुपरेको नाइके टेकराज जोशीको भनाई छ ।
