काठमाडौं । भारतले लकडाउन आगामी मे ३ तारिख अर्थात् वैशाख २१ गतेसम्म लम्ब्याएको छ । त्यहाँका प्रधानमन्त्री नरेन्द्र मोदीले मंगलबार बिहान राष्ट्रका नाममा सम्बोधन गर्दै लकडाउनको अवधि बढाईको घोषणा गरेका हुन् ।
यसअघि घोषणा गरिएको तीन हप्ते लकडाउन बुधबार सकिँदै छ । सबै पक्षसँगको छलफलपछि लकडाउन तीन साता बढाउने निर्णय गरिएको मोदीले बताएका छन् ।
पहिलेभन्दा अझ बढी सतर्कता अपनाउन भारतीय प्रधानमन्त्री मोदीले आम नागरिकलाई आग्रह गरेका छन् । अबको लकडाउन अझ कठोर बनाइने उनले बताएका छन् ।
यसअघि नै उडिसा, पंजाब, महाराष्ट्र, तेलंगाना, पश्चिम बंगाल, कर्नाटक र तमिलनाडु राज्यले यसअघि नै लकडाउनको अवधि बढाउने घोषणा गरिसकेका छन् ।
भारतमा कोरोना संक्रमित १० हजार भन्दा बढी
भारतमा कारोना भाइरस संक्रमितको संख्या १० हजार नाघेको छ । सोमबार एकै दिन भारतमा १२ सय ४८ जनामा कोरोना संक्रमण देखिएसँगै मंगलबार बिहानसम्म संक्रमितको संख्या १० हजार ४ सय ५३ पुगेको छ ।
संक्रमणबाट अहिलेसम्म भारतमा ३ सय ५८ जनाको मृत्यु भइसकेको छ । अहिलेसम्म ११ सय ८१ जना संक्रमित उपचारपछि निको भएका छन् ।
