हेटौंडा । बागमती प्रदेशका मुख्यमन्त्री शालिकराम जम्कट्टेलले विश्वासको मत पाएका छन् । सोमबार प्रदेशसभाबाट उनले तेस्रोपटक विश्वासको मत लिएका हुन् ।
मुख्यमन्त्री कट्टेलले आफूमाथि प्रदेश सभाको विश्वास छ भन्नेबारे राखेको प्रस्तावमाथि सबै दलले धारणा राखेपछि सभामुख भुवन पाठकले निर्णयार्थ प्रस्तुत गरेको प्रस्तावको पक्षमा बहुमत आएको हो।
११० सदस्यीय प्रदेश सभामा उनले आवश्यक ५६ सांसदको विश्वासको मत पाए । विपक्षमा ३७ मत खस्दा १५ मत तटस्थ बसेका छन्।
विश्वासको मत दिने क्रममा १०८ जना सांसद उपिस्थत थिए ।
मुख्यमन्त्री जम्कट्टेले सत्ता गठबन्धनमा रहेका नेकपा एमालेको २७, मओवादी केन्द्रको २१, एकीकृत समाजवादीको ७ र हाम्रो नेपाली पार्टीको १ गरी ५६ मत प्राप्त गरेका हुन्।
विपक्षमा नेपाली कांग्रेसको ३७ मत परेको हो भने राप्रपाका १२ र नेमकिपाका ३ गरी १५ सांसद तटस्थ बसेका हुन्।
विश्वासको मत दिने कार्यक्रममा दुई सांसद रहेको हाम्रो नेपाली पार्टीका एक सांसद उपस्थित भएनन्।
यसअघि उनले पहिलो पटक ३ माघ २०७९ मा १०५ सांसदले समर्थन गरेर विश्वासको मत पाएका थिए। सात राजनीतिक दल हरेको बागमतीमा उतीबेला प्रमुख प्रतिपक्ष दल कांग्रेस सहित ६ दलले विश्वासको मत दिएका थिए।
प्रदेश सरकारको दोस्रो कार्यकाल सुरु हुँदा बनेको माओवादी, एमाले, राप्रपा लगाएत दलहरु मिलेर बनेको गठबन्धन सरकार दुई महिना पनि टिकेन। केन्द्रमा एमाले सरकारबाट बाहिरिएर कांग्रेस, नेकपा एस लगाएत दलले सरकारमा इन्ट्री पाए।
त्यसपछि पुनः दोस्रो पटक १० चैत २०७९ मा ६७ सांसदको समर्थनमा विश्वासको मत पाएका थिए।
तेस्रो पटक भने मुख्यमन्त्रीलाई विश्वासको मत जुटाउन निकै सकस बेहोर्नुपर्यो। सत्तागठबन्धन दलहरुको स्पष्ट बहुमत नहुँदा बागमती प्रदेशमा मात्रै प्रतिनिधित्व गरेको हाम्रो नेपाली पार्टीको सहयोगमा सरकार जोगाउन सफल भए।
सत्ता जोगाउन हानेपा बागमती संसदीय दलका नेता शैलेन्द्रमान बज्राचार्यलाई यसअघि नै सरकारमा सहभागी गराइसकेका थिए।
