काठमाडौं । नेपाल कम्युनिस्ट पार्टी (मसाल) ले भारतीय सीमामा अलपत्र परेका नेपालीलाई तत्काल उद्दार गरी नेपाल ल्याउन पुनः सरकारसँग माग गरेको छ ।
महामन्त्री मोहनविक्रम सिंहले बिहीबार एक वक्तव्य प्रकासित गरी सुदूरपश्चिम क्षेत्रका भारतीय सीमामा हजारौं नेपाली अलपत्र परेका र भारतीय पक्षबाट दुर्व्यवहार भइरहेको भन्दै उनीहरुको तत्काल उद्दार गर्न सरकार तथा सम्बन्धित सबैको ध्यानाकर्षण गराउनुभएको छ ।
महामन्त्री सिंहद्वारा जारी वक्तव्यमा भनिएको छ, ‘अहिले सर्वप्रथम हामीले भारतका बोर्डरहरूमा आएर अलपत्र परेका नेपालीहरूबारे सरकारको ध्यान आकर्षित गर्न चाहन्छौँ । प्रधानमन्त्रीले राष्ट्रका नाममा दिएको सन्देशमा भारतीय सीमामा करिब दुईहजार नेपालीहरू भएको बताइएको छ । वास्तवमा तिनीहरूको अवस्था धेरै नै दयनीय र कष्टप्रद भएको छ । खास गरेर सुदूरपश्चिमका सीमावर्ती क्षेत्रहरूमा आएका नेपालीहरूको अवस्था धेरै नै खराब भएको छ ।
तिनीहरूका लागि भारतीय पक्षद्वारा राम्ररी खानपिनको व्यवस्था गर्ने, राम्रो व्यवहार गर्ने वा आवश्यकतानुसार क्बारेन्टिनमा उनीहरूलाई बेग्लै राखेर स्वास्थ्य परीक्षण वा उपचार गर्ने कार्यमा समेत समुचित ध्यान दिने गरिएको छैन । त्यसकारण हामीले भारतीय सीमामा आएर अलपत्र परेका नेपालीहरूको उद्दार गरेर नेपालमा ल्याएर आवश्यकतानुसार उनीहरूलाई क्बारेनटाइनमा राख्न व्यवस्था गर्नका लागि सरकारसित विशेष माग गर्दछौँ ।
वास्तवमा भारतीय सीमामा आएर बसेका नेपालीहरूको समस्या गम्भीर मानवीय प्रश्न भएको छ । त्यसकारण उनीहरूलाई उद्दार गरेर नेपालमा ल्याउनका लागि हामीले सरकारका साथै सबै राजनीतिक पार्टी, संघसंस्था र सबै न्यायप्रेमी जनताको ध्यान आकर्षित गर्न चाहन्छौँ ।’
