बझाङ । बझाङमा सोमबार (चैत २४ गते) सञ्चालन भएको ‘बान्नीकी चैतली’ मेलामा लकडाउन उल्लंघन गर्दै भिडभाड जम्मा गरेको आरोपमा नौ जना पक्राउ परेका छन् । पक्राउ परेका मध्ये ४ जना वडा अध्यक्ष हुन् ।
कोरोना भाइरसको सम्भावित संक्रमणलाई नियन्त्रण गर्न सरकारले घोषणा गरेको लकडाउनकै बीच बझाङको छविसपाथिभेरा गाँउपालिका–३ मा ‘बान्नीकी चैतली’ मेला सञ्चालन भएको थियो ।
मेला आयोजना गरेर लकडाउन उल्लंघन गरेको आरोपमा गाउँपालिकाका चार जना वडाध्यक्ष, मन्दिरका पुजारी तथा उनका सहयोगी गरी नौ जनालाई प्रहरीले बुधबार नियन्त्रणमा लिएको हो ।
पक्राउ पर्नेमा छविसपाथिभेरा गाउँपालिका–२ का वडाअध्यक्ष विकास ऐडी, ३ का वडाअध्यक्ष केशवराज जोशी, ४ का वडाअध्यक्ष अम्मरराज थापा र वडा नं. ५ का वडाअध्यक्ष तथा गाँउपालिकाका प्रवक्ता लोकेन्द्रबहादुर ठगुन्ना रहेका छन् ।
यस्तै, बान्नी मष्टा मन्दिरका पुजारी निर्पप्रसाद जोशी र उनका दुई सहयोगी फसलपाते पण्डित डम्बर बहादुर धामी र पूजारी जयकृष्ण जोशी, स्थानीय रजबार इन्द्रबहादुर सिंह र मन्दिर संरक्षण समितिका सचिव राजेन्द्रबहादुर सिंहलाई पनि प्रहरीले नियन्त्रणमा लिएको छ ।
लकडाउनका बेला बझाङमा ठुलो भिडभाडसहित मेला सञ्चालन भएको तस्बिरहरु सामाजिक सञ्जालमा भाइरल बनेको थियो ।
