काठमाडौं । नेपाल कम्युनिस्ट पार्टी (मसाल) ले कोरोना भाइरस नियन्त्रणका लागि सरकारले प्रभावकारी कदम चाल्न नसेकेको बताएको छ । सरकारको कमजोरीबाट फाइदा उठाउँदै स्वास्थ्य सामग्री खरिदमा व्यापक अनियमितता भएको मसालले आरोप लगाएको छ ।
पार्टी प्रवक्ता रामप्रकाश पुरीले मंगलबार एक वक्तव्य पकाशित गरी कोरोना भाइरसको समहामारीले विश्वव्यापी रूपमा ठूलो क्षति गरिरहेको बेलामा नेपालमा त्यसको जोखिमबाट बच्नका लागि राज्य र सरकारले प्रभावकारी नेतृत्व दिनु आवश्यक रहेको औँल्याउनुभएको छ ।
यस्तै, मसालले भारतबाट कैयौं व्यक्ति विभिन्न नाका हुँदै नेपाल प्रवेश गरेको सन्दर्भमा उनीहरुको खोजी गरी उचित व्यवस्थापन नगरे उनीहरुमा कोरोना संक्रमण रहेको भए त्यसले गम्भीर रुप लिनसक्ने चिन्तासमेत जाहेर गरेको छ ।
यस्तो छ, वक्तव्य
‘विश्व महामारीको रूपमा फैलिएको कोरना भाइरसको स्थिति गम्भीर बन्दै गएको छ । नेपालमा त्यसको रोकथामका लागि राज्य, सरकार र नागरिक स्तरबाट समेत जिम्मेवारीपूर्वक दायित्व निर्वाह गर्न नसकेमा कोरना भाइरसको स्थिति गम्भीर हुने र त्यसबाट निकै ठूलो क्षति हुन सक्ने सम्भावना छ । देशका सातैवटा प्रद्रेशमा त्यसको पहुँच पुगिसकेको छ र देशमा कोरना भाइरसको स्थिति दोश्रो चरणमा पुगेको छ । यदि यसलाई समयमा नै नियन्त्रण वा त्यसको रोकथाम सम्बन्धीका नियमहरूलाई कडाइपूर्वक लागू गर्न सकिएन भने त्यसको स्थिति छिट्टै छिट्टै नै तेस्रो स्टेजमा उक्लिने सम्भावना छ ।
अहिले सरकारको नीति, प्रशासक, प्रहरी तथा स्वास्थ्यकर्मी समेतको स्थिति कमजोर अवस्थामा रहेको छ । यसप्रकारको कमजोर अवस्थाबाट कोराना भाइरसका विरुद्ध विजय हासिल गर्न मुश्किल पर्ने छ । त्यसैले सरकारले स्वास्थ्य तथा सुरक्षा नीतिहरू व्यवस्थित र प्रभावकारी बनाई प्रशासन, स्वास्थ्य तथा सुरक्षासम्बन्धीको भरपर्दो प्रणालीका लागि सरकारले विशेष ध्यान दिनु आवश्यक छ ।
कोरना भाइरसको महामारीले विश्वव्यापी रूपमा ठूलो क्षति गरिरहेको बेलामा नेपालमा त्यसको जोखिमबाट बच्नका लागि राज्य र सरकारले प्रभावकारी नेतृत्व दिनु आवश्यक छ । तर स्वास्थ्य सामग्री किन्ने सम्बन्धमा देखिएको समस्याले सरकारको कार्यप्रणालीमा गम्भीर कमजोरी रहेको देखिन्छ । त्यस विषयमा भ्रष्टाचारसम्बन्धी सञ्चारमाध्ययमहरूबाट लगातार रूपमा समाचारहरू आइरहेका छन् । त्यसबाट सरकारको कमजोर कार्यप्रणालीको फाइदा उठाउँदै भ्रष्टाचारीहरूले व्यापक चलखेल गरिरहेको देखिन्छ । विश्वमा पैदा भएको सङ्कटको घडीमा सम्पूर्ण मानवजातिले कोरना भाइरसका विरुद्ध सङ्घर्ष गरिरहेको बेलामा नेपालमा पनि सरकार र नागरिक दुवैले सशक्त भूमिका खेल्नुपर्ने आवश्यकता छ । सरकारले आफ्नो कमजोर कार्यप्रणालीमा सुधार गरी भ्रष्टाचारी तथा कालोबजारीलाई कडा कारवाही गर्नका लागि हामी सरकारको ध्यान आकर्षित गर्दछौँ ।
सरकारले लकडाउनको समयलाई फेरि लब्याउने निर्णय गरेको छ । नेपालमा कोरना भाइरसको बढ्दो सङ्क्रमणको सम्भावनामाथि ध्यान दिंदा सरकारको त्यो निर्णय सही नै भएको छ । तर लकडाउनको समयमा भारतबाट अनियमित रूपमा नेपाल प्रवेश गर्नेहरूको ठूलो सङ्ख्या रहेकोले त्यसको सम्भावित दुष्परिणाममाथि ध्यान दिएर त्यसरी प्रवेश गरेका व्यक्तिहरूको खोजतलास गरी उनीहरूको स्वास्थ्यस्थितिबारे सरकारले ध्यान दिनु आवश्यक छ । प्रधानमन्त्रीको चैत्र २५ गतेको सम्बोधनमा भारतको सीमामा नेपालीहरू रहेको भनी स्वीकार गरिएको छ । भारतले उनीहरूको समुचित व्यवस्था गरिरहेको छैन । त्यसकारण उनीहरूलाई नेपालमा ल्याएर क्वाराइनटाइनमा राख्न र आवश्यक उपचारको समेत व्यवस्था गर्न सरकारसित हामी जोड दिन्छौँ ।
अहिले क्वाराइटाइनको जाँच गर्ने कमजोर व्यवस्था रहेको छ । यसप्रकारको कमजोर व्यवस्थालाई सुधार गरी देशका सातवटै प्रदेशहरूमा क्वाराइटान जाँचको मजवुत व्यवस्था गर्नेतर्फ सरकारले पूरा ध्यान दिन आवश्यक छ । हजारौ व्यक्तिहरू भारतबाट नेपालमा आएकाले उनीहरूलाई क्वाराइनटाइनमा राखेर जाँच गर्न आवश्यक छ । त्यसो गरिएन देशमा भयावह स्थिति आउने सम्भावना छ । स्थानीय र प्रदेश निकायहरूले कोरना भाइरससम्बन्धी कसरी भूमिका खेलिरहेका छन् भन्ने विषयमा समेत सरकारले विशेष ध्यान दिएर सबै संयन्त्रलाई प्रभावकारी बनाउनका लागि हामी सरकारसित जोड गर्न चाहन्छौँ ।’
