काठमाडौं । नेपाली कांग्रेसका नेता शंकर भण्डारीको नेतृत्वमा सनातन हिन्दुराष्ट्र स्थापना महाअभियानको औपचारिक घोषणा गरिएको छ। आगामी सोमबारदेखि सुरु हुने महासमिति बैठकको पूर्वसन्ध्यामा यो अभियान सुरु भएको हो।
शनिबार काठमाडौँमा आयोजित एक कार्यक्रमकाबीच सांसदसमेत रहेका कांग्रेस केन्द्रीय सदस्य भण्डारीको अगुवाईमा २२ नेताले सो अभियान घोषणा गरेका हुन् ।
शुक्रबार बसेको केन्द्रीय समितिको बैठकमा पनि ती नेताले पार्टी हिन्दुराष्ट्रको पक्षमा उभिनुपर्ने भन्दै पूरक प्रस्ताव दर्ता गराएका थिए।
पार्टी सनातन हिन्दुराष्ट्रको पक्षमा उभिनुपर्ने भन्दै २२ जना केन्द्रीय सदस्यले हस्ताक्षर संकलन गरेका थिए। केन्द्रीय सदस्य शंकर भण्डारीले सभापति शेरबहादुर देउवालाई उक्त प्रस्तावपत्र बुझाएका थिए।
जसमा हस्ताक्षर गर्नेमा पुष्पा भुसाल, देवेन्द्रराज कँडेल, प्रकाश रसाइली स्नेही, विद्या तिमल्सिना, गेहेन्द्र गिरी, रंगमती शाही, सीता देवकोटा, सीता कुमारी, दिलेन्द्र बडु, डा. डिला संग्रौला, शारदा पौडेल र अर्जनुबहादुर सिंह, चम्पादेवी खड्का, नागिना यादव, नृपबहादुर वड, सञ्जय गौतम, भीम पराजुली, दिनेश कोइराला र मुक्ताकुमारी यादव पनि छन्।
प्रस्तावमा हस्ताक्षर गर्ने प्रदेश सभापतिहरूमा बाग्मतीका इन्द्रबहादुर बानियाँ र गण्डकीका शुक्रराज शर्मासमेत छन्।
उनीहरूले वैदिक सनातन हिन्दु राष्ट्र कायम गर्न त्रिवेणी धाम र काठमाडौँमा भएको महासमिति बैठकका बहुमत महासमिति सदस्यहरूले प्रस्ताव राखेको पनि नेतृत्वलाई सम्झाएका छन्।
