काठमाडौं । कोशी प्रदेशमा सरकार विस्तार भएको छ । शुक्रबार कोशी प्रदेशप्रमुख पर्शुराम खापुङले नवनियुक्त चार मन्त्री तथा दुई राज्य मन्त्रीहरूलाई पद तथा गोपनीयताको शपथग्रहण गराए ।
मुख्यमन्त्री केदार कार्कीले ४ जना मन्त्री तथा दुईजना राज्यमन्त्री थप गर्दै मन्त्रीमण्डल बिस्तार गरेका हुन् ।
मुख्यमन्त्री कार्कीले स्वास्थ्य मन्त्रालयमा प्रदीपकुमार सुनुवार, उद्योग कृषि तथा सहकारी मन्त्रीमा रामकुमार खत्री, खानेपानी, सिंचाई तथा उर्जा मन्त्रालयमा नारायण बुर्जा मगर, सामाजिक विकास मन्त्रीमा राजेन्द्र कार्की, आर्थिक मामिला तथा योजना मन्त्रालय राज्यमन्त्रीमा इन्दिरा थापा र आन्तरिक मामिला तथा कानून मन्त्रालयको राज्यमन्त्रीमा सुनिताकुमारी रामलाई जिम्मेवारी दिएका छन्।
समाजवादी असन्तुष्ट
मुख्यमन्त्री कार्कीले मन्त्रिपरिषद् विस्तार गरेपछि सत्ता साझेदार नेकपा एकीकृत समाजवादी पार्टी रुष्ट बनेको छ। एकीकृत समाजवादीले मुख्यमन्त्री कार्कीले सहमति पालना नगरेको भन्दै गल्ती नसच्याए विकल्प खोजेर अघि बढ्ने चेतावनीसमेत दिएको छ।
समाजवादी कोसी प्रदेश संसदीय दलका नेता राजेन्द्र राईले विगतको सहमति पालना नभएको भन्दै आपत्ति जनाएका हुन्। हाल एक मन्त्री लिएको एकीकृत समाजवादीलाई सहमतिअनुसार अर्को मन्त्री नदिएको भन्दै राईले आक्रोश व्यक्त गरेका छन्।
‘मुख्यमन्त्रीजीले हामीलाई थप एउटा मन्त्रालय दिने सहमति विगतमै गर्नु भएको थियो। कांग्रेसले थप मन्त्रालय नपाउने गरी यसअघि सहमति गरिएको हो’ उनले भने, ‘तर अहिले मन्त्रीमण्डल विस्तार हुँदा उहाँले हामीसँगको सहमति पालना गर्नु भएन।’
मुख्यमन्त्रीले शुक्रबारको कदम सच्याउन तयार नभए विकल्प खोजेर अघि जाने पूर्वमुख्यमन्त्री राईले बताए।
