काठमाडौं । राष्ट्रिय स्वतन्त्र पार्टीका सभापति रवि लामिछाने र पूर्वउपराष्ट्रपति नन्दबहादुर पुनका छोरा दीपेश पुन विरुद्ध कास्की प्रहरीमा जाहेरी परेको छ ।
पोखरास्थित सूर्यदर्शन बचत तथा ऋण सहकारीका पीडितहरूले उनीहरूविरुद्ध सोमबार जिल्ला प्रहरी कार्यालय कास्कीमा जाहेरी दिएका हुन् ।
दीपेश नेकपा माओवादी केन्द्रनिकट अखिल क्रान्तिकारीका महासचिव हुन्।
पोखरा महानगरपालिकाले गठन गरेको छानबिन समितिले रविसहितका व्यक्तिहरुलाई पनि दोषी किटान गरेकाले ती व्यक्तिमाथि पनि अनुसन्धान हुनुपर्ने मागसहित प्रहरीमा दोस्रो निवेदन बुझाइएको सूर्यदर्शन सहकारी पीडित संघर्ष समितिका संयोजक किरण श्रेष्ठले जानकारी दिए।
सूर्यदर्शन सहकारीको पैसा रवि प्रबन्ध निर्देशक रहेको ग्यालेक्सी फोरके टेलिभिजनमा लगानी गरिएको सार्वजनिक भइसकेको र लगानी नै गर्न नमिल्ने ठाउँमा सहकारीले लगानी गर्दा रवि लामिछाने टेलिभिजनको प्रबन्ध निर्देशक रहेको मात्र नभएर महानगरले गरेको छानबिन प्रतिवेदनमा पनि नाम मुछिएकाले उनीसहितका व्यक्तिहरुमाथि पनि अनुसन्धान गरिनुपर्ने आफ्नो माग रहेको संघर्ष समितिका संयोजक किरणको भनाइ छ।
सूर्यदर्शन सहकारीका बचतकर्ताको १ अर्बभन्दा बढी रकम अपचलन गरेर सहकारीका पूर्वअध्यक्ष गितेन्द्र (जीबी) राईसहित दर्जनौँ व्यक्ति अहिले फरार छन्।
उक्त सहकारीका कोषाध्यक्ष कुमार रम्तेलसहितलाई जिल्ला अदालत कास्कीले पुर्पक्षका लागि थुनामा पठाएको छ। सहकारीका उपाध्यक्ष कैलाशकुमार दर्लामी र युवा संघ नेपालका केन्द्रीय उपमहासचिव शिवबहादुर गुरुङ (महेन्द्र भोटे) पनि जेल चलान भएका छन्।
पोखरामा जीबी राई अध्यक्ष रहेको समूहले खोलेको सूर्यदर्शन सहकारीमार्फत् बचतकर्ताको रकम अपचलन गरेको उजुरीका आधारमा १९ जनाविरुद्ध पक्राउ पुर्जी जारी भएको थियो।
ग्यालेक्सी फोरके टेलिभिजनका अध्यक्षसमेत रहेका जीबी राईले पोखराको सूर्यदर्शन सहकारीबाट १० करोड रुपैयाँ गैरकानुनी रूपमा झिकेको छानबिन प्रतिवेदनले देखाएको थियो।
जिल्ला अदालत, कास्कीमा दर्ता सहकारी ठगी मुद्दामा १ अर्ब ११ करोड ३४ लाख ४३ हजार ४५ रुपैयाँ बिगो रकम जाहेरवालालाई दिलाउन माग गरिएको थियो।
