काठमाडौं । मदन भण्डारीले प्रतिपादन गरेको जनताको बहुदलीय जनवाद (जबज) ले नेकपा (एकीकृत समाजवादी) भित्र विवाद चर्किएको छ । पार्टीका सम्मानित नेता झलनाथ खनाल र अध्यक्ष माधवकुमार नेपालबीच जबज मान्ने कि नमान्ने भन्ने विषयमा मतभेद भएको हो ।
नेता खनालले जबज माने एमालेमै फर्किए हुने बताएपछि अध्यक्ष नेपालले जबज परित्याग गर्नु आत्मसमर्पणवाद भएको भन्दै प्रतिवाद गरेका छन् ।
सोमवार काठमाडौंमा जारी पार्टीको केन्द्रीय परिषद बैठकमा बोल्दै दुई नेताले घोचपेचसमेत गरेका छन् ।
जबज माने एमाले छँदैछ : खनाल
सम्मानित नेता खनालले पार्टीले जबज भनेमा मानिसहरु एमालेतिर जाने जिकीर गरे। नेता खनालले पार्टीको कार्यदिशा र कार्यनीति स्पष्ट हुनुपर्ने भन्दै पार्टीले जनताको बहुदलीय जनवाद र समाजवाद दुवै कुरा भनिरहेकोमा जबजमा जाने कि समाजवादमा जाने स्पष्ट हुनुपर्ने बताए ।
नेता खनालले एमाले ठूलो जबजवाला भएको भन्दै मानिसहरुले जबजको कुरा आफूहरुको भन्दा केपी ओलीको बढी सुन्ने बताए । उनले पार्टीले जबज मान्ने कुरा खतरा हुने बताए ।
उनले भने, ‘कहिले हामी जबज पनि भन्छौँ कहिले समाजवाद पनि भन्छौँ। कता जाने त? जबज तपाई भन्नुहुन्छ भने त ठूलो जबजतिर किन नजाने भन्छ नि त मान्छेले? ठूलो जबजवाला त एमाले छ। हामीले जबज भन्यो भने त हामीले भनेको सुन्ने भन्दा केपीले भनेको चाहीँ बढ्ता सुन्छ हेर्नुस्। त्यो खतरा हुन्छ ।’
यस विषयमा आवश्यक छलफल र बहश गरि स्पष्ट हुनुपर्नेमा खनालले जोड दिए। सम्मानित नेता खनालले रुसमा पनि बहुदलीय जनवाद भएको उल्लेख गर्दै लेनिनले जबज किन मान्नुभएन? भनि प्रश्न समेत गरे।
जबजलाई मिल्काइदिउँ भन्नु आत्मसमर्पणवाद : नेपाल
अध्यक्ष नेपालले भने पार्टीले जनताको बहुदलीय जनवाद (जबज) को विचाराधारालाई त्याग्न नसक्ने अडान लिए । उनले जबजको उपादेयता छैन भन्ने मान्यता आत्मघाती र आत्मसमर्पणवादी भएको जिकिर समेत गरे।
खनालप्रति संकेत गर्दै उनले अहिले पनि कम्युनिष्ट पार्टीहरुमाथि तानाशाही र अधिनायकवादीको आरोप लगाउने क्रम नसकिएकाले त्यसको प्रतिवाद गर्न पनि जबजको विकल्प नभएको बताए।
उनले मदन भण्डारीद्वारा प्रतिपादित सो विचारधाराको पेटेन्ट राईट आफ्नो पार्टीसँग रहेको दाबी गर्दै त्यसलाई मिल्काइदिउँ भन्ने खालको मान्यता मान्य नहुने चेतावनी दिए।
अध्यक्ष नेपालले भने, ‘जनताको बहुदलीय जनवादको उपादेयता सकियो, यसको कुनै काम छैन, यसलाई मिल्काइदिऊँ भन्ने खालको मान्यता त्यो आत्माघाती, आत्मसमर्पणवादी मान्यता हो।’
