काठमाडौं । राष्ट्रिय सभा सदस्य निर्वाचनमा सत्तागठबन्धन १८ सिटमा विजयी हुँदा प्रमुख प्रतिपक्ष दल नेकपा एमाले एक सिटमा विजयी भएको छ । बिहीवार भएको निर्वाचनमा सात प्रदेशमध्ये कोशी प्रदेशको एक सिटमा एमालले बाजी मारेको हो ।
राष्ट्रिय सभाका १९ मध्ये १८ सिटमा सत्ता गठबन्धनका उम्मेदवारहरू विजयी हुँदा कोसी प्रदेशको महिलातर्फको सिटमा भने सत्ता गठबन्धनको तर्फबाट उम्मेदवार बनेकी माओवादी केन्द्रकी चम्पादेवी कार्कीलाई एमाले उम्मेदवार रुक्मिणी कोइरालाले पराजित गरेकी हुन्।
यसपटक भएको निर्वाचनका एमालेले १९ वटै सिटमा उम्मेदवार उठाएको थियो। तीमध्ये कोसी प्रदेशको खुलातर्फको सिटमा अन्तिम समयमा उसले तालमेल गरी राप्रपाका उद्धव पौडेललाई सघायो भने महिलातर्फ आफ्नै उम्मेदवार रुक्मिणी कोइरालाको पक्षमा राप्रपाको समर्थन बटुल्यो।
राप्रपासँगको तालमेल र सत्ता गठबन्धनका केही मतदाताको मतबाट एमाले उम्मेदवार कोइराला विजयी भए पनि एमालेको समर्थन प्राप्त गरेका राप्रपा उम्मेदवार उद्धव पौडेलले कांग्रेस उम्मेदवार कृष्ण सिटौलालाई पराजित गर्न सकेनन्।
सत्ता गठबन्धनको कांग्रेसभित्र देखिएको विवादका कारण कोसी प्रदेशमा आंशिक सफलता हासिल गर्न एमाले सफल भएको छ।
यी हुन् निर्वाचित १९ जना
राष्ट्रिय सभा सदस्यका लागि कोशीमा सत्ता गठबन्धनबाट नेपाल्ी काग्रेसका कृष्णप्रसाद सिटौला र नेकपा एमालेकी रुक्मणि कोईराला निर्वाचित भए ।
मधेस प्रदेशबाट गठबन्धबाट नेपाली कांग्रेसका आनन्दप्रसाद ढुंगाना र जनता समाजवादी पार्टी, नेपालकी पूजा चौधरीले बाजी मारे ।
त्यस्तै, बागमती प्रदेशबाट गठबन्धनबाट नेपाल्ी कांग्रेसका विष्णुकुमारी पुडासैनी, नेपाली कांग्रेसकै जितजंग बस्नेत, नेकपा (माओवादी केन्द्र) का श्रीकृष्ण अधिकारी, नेकपा (एकीकृत समाजवादी) का घनश्याम रिजाल निर्वाचित भए ।
यसैगरी, गण्डकी प्रदेशबाट सत्ता गठबन्धनकै नेपाली कांग्रेसका पदमबहादुर परियार, नेपाली कांग्रेसका किरणबाबु श्रेष्ठ नेकपा (माओवादी केन्द्र) का मनरुपा शर्मा निर्वाचित भए । लुम्बिनी प्रदेशबाट गठबन्धनकै नेपाली कांग्रेसका विष्णुकुमारी सापकोटा र नेकपा (माओवादी केन्द्र) का झक्कु सुवेदी निर्वाचित भएका छन् ।
कर्णाली प्रदेशमा गठबन्धनबाट नेपाली कांग्रेसका कृष्णबहादुर रोकाया, नेकपा (एकीकृत समावादी) का सावित्री मल्ल, नेकपा (माओवादी केन्द्र) का विष्णुबहादुर विश्वकर्मा निर्वाचित भए ।
यता सुदूरपश्चिम प्रदेशमा सत्ता गठबन्धनबाट नेपाली कांग्रेसका बलदेव बोहरा र नरायणदत्त भट्ट तथा नेकपा (माओवादी केन्द्र) का रेणु चन्द निर्वाचित भएका छन् ।
राष्ट्रिय सभामा १९ सिटका लागि बिहीवार मतदान भएको हो । जसमा नेपाली कांग्रेस १० सिटमा विजयी भएको छ भने सत्ता गठबन्धनबाटै नेकपा (माओवादी केन्द्र) ५ सिट र नेकपा (एकीकृत समाजवादी) ले दुई सिट जितेको छ ।
त्यस्तै जनता समाजवादी पार्टीले एक सिट जितेको छ भने प्रमुख प्रतिपक्ष दल नेकपा एमालेले १ सिट जितेको छ ।
