शुक्रराज भण्डारी, दाङ ।
दाङमा कोरोना भाइरसको आशंकामा २५ जना आइसोलेनमा भर्ना भएकोमा १६ जनाको रिर्पोट निगेटिभ देखिएपछि डिस्चार्ज भएका छन् । यस्तै पाँच जनालाई कोरोनाको कुनै लक्षण नदेखिएपछि होम क्वारेन्टिनमा बस्न सुझावसहित फिर्ता गरिएको छ । चार जना बेलझुण्डीको कोरोना विषेश अस्पतालमा अहिले पनि उपचारका क्रममा रहेका छन् ।

आइसोलेसनमा भर्ना भएकामध्ये ६ जना राप्ती स्वास्थ्य बिज्ञान प्रतिष्ठानबाट डिस्चार्ज भएका हुन् भने बेलझुण्डीबाट १० जनालाई डिस्चार्ज गरिएको छ । स्वास्थ्य कार्यालय दाङका फोकलपर्सन कमल चन्दका अनुसार अहिले बेलझुण्डीमा रहेको कोरोना बिशेष अस्पतालमा ४ जनाको उपचार कार्य जारी रहेको छ । उपचार गराएका मध्ये १६ जनाको स्वाब परिक्षणको रिर्पोट निगेटिभ देखिएको हो ।

यस्तै बेलझुण्डीमा उपचार गराइरहेकामध्ये ४ जनाको स्वाब परिक्षणका लागि पठाउने तयारी गर्न लागेको फोकलपर्सन चन्दले जानकारी दिनुभयो । राप्ती स्वास्थ्य बिज्ञान प्रतिष्ठान र प्रदेश सरकारले सञ्चालन गरेको कोरोना बिशेष अस्पतालमा कतार र भारतबाट आएका नागरिक मात्रै भर्ना भएका छन् । साथै सबै स्थानीय पालिकाले आइसोलेसन अगाबै क्वारेन्टाइनमा राखेर उपचार गरिरहेका छन् ।

दश स्थानीय तहमा क्वारेन्टिन
दाङका सबै स्थानीय तहले कोरोना भाइरसको न्यूनीकरणका लागि क्वारेन्टिन निर्माण गरेका छन् । कम्तीमा पाँचदेखि ६० बेडसम्मका क्वारेन्टिन निर्माण गरेका हुन् । स्वास्थ्य कार्यालय दाङका अनुसार सबैभन्दा धेरै घोराहीले कुइरेपानीमा ६० बेडको क्वारेन्टाइन निर्माण गरेको छ ।

त्यसैगरी बबई गाउँपालिकाले ५० बेडको क्वारेन्टाइन निर्माण गरेको छ । जिल्ला स्वास्थ्य कार्यालय दाङका फोकलपर्सन कमल चन्दका अनुसार तुलसीपुरमा ५०, लमहीमा ३५ निर्माण गरिएका छन् । यस्तै गढवाले १०, राजपुरले २५ र राप्ती गाउँपालिकाले २५ बेड तयार पारेको छ ।

यस्तै शान्तिनगर गाउँपालिकाले १०, दंगीशरणले ३० र बंगलाचुली गाउँपालिकाले ३० वटा बेड तयार पारेको फोकलपर्सन चन्दले जानकारी दिनुभएको छ । दाङमा स्थानीय पालिकाले बाहेक प्रदेश सरकारले बेलझुण्डीमा कोरोना बिशेष अस्पताल सञ्चालनमा ल्याएको छ ।

भारतबाट आउनेको संख्या धेरै
कोरोना भाईरसको हल्ला चलेसँगै भारतबाट फिर्ता हुनेको संख्या धेरै रहेको छ । स्थानीय सरकारले संकलन गरेको तथ्यांक अनुसार तेस्रो मुलुकको तुलनामा भारतबाट फिर्ता हुनेको संख्या धेरै रहेको हो ।

दाङका दश स्थानीय तहमा सबैभन्दा धेरै भारतबाट फिर्ता हुने नागरिकको संख्या रहेको छ । बंगलाचुलीमा १४ सय नागरिक फिर्ता भएकोमा १३ सय ९८ जना भारतबाट आएका छन् भने २ जना मात्रै तेस्रो मुलुकबाट आएका नागरिक रहेका छन् । यस्तै घोराहीमा दुई सय ५० बढी नागरिक स्वदेश फिर्ता भएको प्रबक्ता भरत अर्यालले जानकारी दिनुभएको छ ।

यस्तै, गढवामा एक सय ५२ जना स्वदेश फिर्ता भएकोमा दुई जना मात्रै तेस्रो मुलुकबाट आएका छन् । तुलसीपुरका प्रबक्ता सुर्यबहादुर डाँगीका अनुसार दुई सय ८१ जना नागरिक मध्ये सबैभन्दा धेरै भारतबाट आएका छन् । उनीहरुको स्थानीय जनप्रतिनीधिको निगरानीमा होम क्वारेन्टाइनमा राखिएको छ ।

यस्तै बबईमा ८६ जना, शान्तिनगरमा ३३, दंगीशरणमा २० जना फिर्ता भएका छन् । उनीहरु सबै भारतबाट फिर्ता भएको स्थानीय तहका जनप्रतिनीधिले जनाएका छन् । राप्ती र राजपुरमा पनि भारतबाट आएका धेरै नागरिक छन् भने लमही नगरपालिकामा पनि भारतबाट आएका नागरिक धेरै रहेका छन् । उनीहरु सबैलाई होम क्वारेन्टाइनमै बस्न निर्देशन दिइएको जनाइएको छ ।