काठमाडौँ । प्रगतिशील पत्रकार सङ्घले आफ्ना मागको पक्षमा दबाब सिर्जना गर्न नेपाल सरकारलाई ज्ञापनपत्र बुझाउने भएको छ ।
२०८० माघ ८ गते अध्यक्ष श्यामलाल पोखरेलद्वारा जारी प्रेसविज्ञप्तिमा सो जानकारी दिइएको हो ।
माघ ५ र ६ गते कपिलवस्तुको बडहरामा सम्पन्न केन्द्रीय समितिको बैठकका निर्णय सार्वजनिक गर्न उक्त विज्ञप्ति जारी गरिएको अध्यक्ष पोखरेलले जानकारी गराउनुभएको छ ।
प्रेसविज्ञप्तिमा सङ्घको केन्द्रीय समिति बैठक प्रत्येक चार/चार महिनामा बस्ने, सोअनुसार आगामी जेठमा प्युठानमा केन्द्रीय समितिको बैठक बस्ने, प्रत्येक वर्षको वैशाख महिनालाई सदस्यता नवीकरण महिना किटानी गर्ने, राष्ट्रिय स्तरको कार्यशाला कार्यक्रम सम्पन्न गर्ने, प्रपस बागलुङका सचिव विजय रानामाथि प्रहरी दमनको विरोधमा कार्यक्रम गर्ने निर्णय गरिएको उल्लेख छ ।
त्यसैगरी विज्ञप्तिमा प्रथम राष्ट्रिय सम्मेलनका दस्तावेज प्रकाशन गर्ने, प्रदेश इन्चार्जको किटानी, १५ लाख बराबरको अक्षयकोष निर्माण गर्ने, सङ्घलाई दर्ता गर्ने, पत्रकारको दुर्घटना तथा स्वास्थ्यबिमाका लागि पहल गर्ने, केन्द्रीय मुखपत्र “प्रगतिशील” दर्ता गर्ने निर्णय गरिएको उल्लेख छ ।
यस्तो छ, प्रेसविज्ञप्तिको पूर्ण पाठ :
“प्रगतिशील पत्रकार सङ्घ, नेपाल केन्द्रीय समितिको बैठक २०८० माघ ५ र ६ गते कपिलवस्तुको बडहरामा सम्पन्न भयो । सो बैठकका निर्णयहरू सार्वजनिक गर्नका लागि यो प्रेसविज्ञप्ति जारी गरिएको छ ।
१. प्रपसको केन्द्रीय कार्यालय काठमाडौँमा र सम्पर्क कार्यालय रुपन्देहीको बुटवलमा राख्ने निर्णय गरिएको छ ।
२. गत २०७९ चैत २४ र २५ गते बुटवलमा सम्पन्न प्रथम राष्ट्रिय सम्मेलनद्वारा पारित घोषणापत्र, विधान, प्रतिवेदन र बुटवल घोषणा तत्कालै प्रकाशन गर्ने निर्णय गरिएको छ ।
३. प्रपस बागलुङका सचिव विजय रानामाथि न्युज रिपोर्टिङको क्रममा गत पुस २१ गते राती भएको प्रहरी दमनका दोषीमाथि कारबाही गराउन केन्द्रीय समितिको आयोजनामा जिल्लामा विरोध कार्यक्रम गर्ने निर्णय गरियो । सो कार्य सम्पन्न गर्न केन्द्रीय सचिव ताराप्रसाद शर्मा र केन्द्रीय सदस्य प्रकाश छन्त्याललाई जिम्मा दिइएको छ ।
४. केन्द्रीय समितिको निर्देशनअनुसार पत्रकारको क्षमता विकासका लागि राष्ट्रिय स्तरको कार्यशाला सम्पन्न गर्ने, सङ्घका मागबारे सरकारमाथि दबाब सिर्जना गर्न ज्ञापनपत्र बुझाउने र प्रदेश तथा जिल्लास्तरमा अन्तरक्रिया, प्रशिक्षणमूलक जस्ता कार्यक्रम गर्ने निर्णय भएको छ । त्यससम्बन्धी आवश्यक निर्णय केन्द्रमा सचिवालय र अन्य स्थानमा सम्बन्धित समितिले गर्ने छन् ।
५. अबदेखि प्रत्येक चार/चार महिनामा केन्द्रीय समितिको बैठक बस्ने निर्णय गरिएको छ । सोअनुसार केन्द्रीय समितिको आगामी बैठक २०८१ जेठ महिनामा प्युठानमा बस्ने छ ।
६. सङ्गठनात्मक गतिविधिलाई तीव्रता दिन प्रदेश इन्चार्जबारे निर्णय गरिएको छ । इन्चार्जको व्यवस्था यस प्रकार छ : कोशी प्रदेश र मधेस प्रदेश – प्रकाश थापामगर, बागमती प्रदेश – रमेश पौडेल, गण्डकी प्रदेश – ताराप्रसाद शर्मा, लुम्बिनी प्रदेश – गोपालप्रसाद भट्टराई, कर्नाली प्रदेश – नारायण गिरी, सुदूरपश्चिम प्रदेश – विनोद पौडेल ।
७. केन्द्रीय समितिमा माधव भाट (कपिलवस्तु) लाई केन्द्रीय सदस्यमा र सिर्जना सुवेदी (जुम्ला) लाई केन्द्रीय वैकल्पिक सदस्यमा मनोनित गरिएको छ । त्यस्तै, बागलुङको का.वा. अध्यक्षमा प्रकाश छन्त्याललाई नियुक्त गरिएको छ ।
८. २०८० चैत १५ गतेभित्र आवश्यकताअनुसार प्रदेश र जिल्ला समितिको भेला गर्ने तथा प्रत्येक वर्षको वैशाख महिनालाई सदस्यता नवीकरण महिनाको रूपमा छुट्याइएको छ ।
९. सामुदायिक रेडियो प्रसारक सङ्घ (अकोर्याब) र पत्रकार महासङ्घको चुनावबारे छलफल भयो । अकोर्याब चुनावबारे समन्वय गर्ने जिम्मा शुक्रराज भण्डारीलाई र पत्रकार महासङ्घको चुनावबारे आवश्यक निर्णय गर्न केन्द्रीय सचिवालयलाई जिम्मा दिइएको छ ।
१०. प्रपसको केन्द्रीय मुखपत्र “प्रगतिशील” प्रकाशन गर्ने निर्णय गरिएको छ ।
११. श्रमजीवी पत्रकारका लागि आगामी दुई वर्षभित्र १५ लाख बराबरको “पत्रकार सहायता अक्षयकोष” निर्माण गर्ने निर्णय गरिएको छ ।
१२. अनिवार्य रूपमा पत्रकार दुर्घटना बिमा तथा स्वास्थ्य बिमाका लागि पहल गर्ने निर्णय गरियो ।
१३. प्रपसको दर्ता प्रक्रिया अगाडि बढाउने निर्णय भएको छ ।”
