शङ्करप्रसाद पोखरेल, बुटवल ।
राष्ट्रिय जनमोर्चाका अध्यक्ष तथा प्रतिनिधिसभाका सांसद चित्रबहादुर केसीले भारतले नेपालमा फेरि राजतन्त्र फर्काउन चाहेको बताउनुभएको छ ।
ऐतिहासिक तीन अभियानअन्तर्गत शताब्दी स्मृतिदिवसको अवसरमा २०८० माघ ७ गते आइतबार बुटवलको मेरिगोल्ड होटलमा आयोजित कार्यक्रममा प्रमुख अतिथिको आसनबाट बोल्दै उहाँले यस्तो अभिव्यक्ति दिनुभएको हो ।
नेकपा (मसाल) रुपन्देहीको आयोजनामा सम्पन्न उक्त कार्यक्रममा मन्तव्य राख्दै केसीले भारतीय साम्राज्यवादले नेपाललाई हिन्दु राष्ट्र बनाउँदै राजतन्त्र फर्काउन चाहेको आरोप लगाउनुभयो ।
‘भारतले नेपाललाई हिन्दु राष्ट्र बनाउन चाहेको कुरा त तपाईं हामीलाई थाहै छ’ उहाँले भन्नुभयो– ‘नेपाललाई हिन्दु राष्ट्र बनाउनु भनेको त्यसको संरक्षकको रूपमा राजतन्त्रलाई पुनः फर्काउनु हो ।’
उहाँले नेपालका विभिन्न राजनीतिक शक्तिलाई भारतीय साम्राज्यवादले उपयोग गर्न प्रयोग गर्न खोजेको दाबी गर्नुभयो ।
‘सामन्त गोयलले भेट गरेपछि केपी ओलीले त लाइन फेरे’ उहाँले भन्नुभयो– ‘गोयलसित भेट गरेपछि ओली हिन्दु राष्ट्रको पक्षमा उभिए, हुँदाखाँदाको बहुमतको संसद् पटक पटक विघटन गरे ।’
उहाँले २०६० सालपछि जन्मेको पिँढीले राजतन्त्र कस्तो हुन्छ भन्ने थाहा नभएकाले राजावादीहरूले तिनैलाई उपयोग गरिरहेको बताउनुभयो ।
‘हामीले पो लामो सङ्घर्ष गरेर यतिसम्म अधिकार पाएका हौँ, २०६० सालपछि जन्मेको नयाँ पिँढीलाई राजतन्त्रको बारेमा के थाहा ?’ उहाँको भनाइ थियो ।
अध्यक्ष केसीले नेपालमा नयाँ जनवादी क्रान्ति गर्ने परिस्थिति तयार नहुँदासम्म गणतन्त्रलाई संस्थागत गर्नुको विकल्प नरहेको उहाँले बताउनुभयो ।
उहाँले भन्नुभयो– ‘गणतन्त्रले जनताको समस्या समाधान गर्दैन भन्ने हामीलाई थाहा छ तर नयाँ जनवादी व्यवस्थाका लागि सशस्त्र सङ्घर्ष सुरु गर्नुभन्दा पहिला यही गणतन्त्रलाई संस्थागत गर्नुपर्ने बाध्यता हामीसँग छ ।
अध्यक्ष केसीले कार्यक्रमको पूर्वाद्र्धमा नेकपा (मसाल) को तर्फबाट तयार पारिएको कार्यपत्र प्रस्तुत गर्नुभएको थियो ।
कार्यक्रममा वामपन्थी बुद्धिजीवी युवराज पन्थी, वामपन्थी बुद्धिजीवी तथा अधिवक्ता तेजप्रसाद कँडेल र अर्का वामपन्थी बुद्धिजीवी ऋषिराम भुसालले टिप्पणी गर्नुभएको थियो ।
कार्यपत्रमाथि केन्द्रित रहँदै क्रान्तिकारी कम्युनिस्ट पार्टीका नेता प्रेम सुवेदी, नेकपा विप्लव पक्षका वीरेन्द्र सी, नेकपा (माले) का सचिवालय सदस्य गोपालमणि गौतम र अखिल नेपाल बुद्धिजीवी सङ्घ रुपन्देहीका अध्यक्ष लीलबहादुर केसीले मन्तव्य राख्नुभएको थियो ।
कम्युनिस्ट सङ्ग्रहालयका अध्यक्ष चेतनाथ आचार्यको सञ्चालन तथा नेकपा (मसाल) रुपन्देहीका प्रवक्ता लालचन्द पन्थको अध्यक्षतामा अगाडि बढेको सो कार्यक्रममा उपस्थित जनसमुदायलाई तराई–मधेस जनवादी मोर्चाका अध्यक्ष बद्रे आलमले स्वागत गर्नुभएको थियो ।
