काठमाडौँ । माघ २ गते मङ्गलबार बिहान त्रिशूली नदीमा खसेको गाडीका चालक बस चढेर नारायणगढतर्फ लागेका थिए । त्यसका साथै उक्त दुर्घटनामा मानवीय क्षति नभएको स्पष्ट भएको छ ।
बी.आर. ०९ जी.सी. १४३० भारतीय नम्बर प्लेटको सेतो रङको सिङ्गल क्याब बोलेरो मङ्गलबार विहान त्रिशूलीमा खसेको थियो ।
सशस्त्र प्रहरीको गोताखोरले त्रिशूलीमा गाडी खसेको आशङ्कापछि नदीमा पसेर खोजी गर्दा सो गाडी फेला परेको हो । गाडीलाई प्रहरीले डोरीले बाँधेर राखेको छ ।
गाडीमा भारतीय चालक सनिक कुमार मात्रै रहेको खुलेको छ । गाडी खसेपछि उनी नारायणगढतर्फ जाने बसमा चढेर गएको खुलेको जिल्ला प्रहरी कार्यालय चितवनका प्रवक्ता डिएसपी श्रीराम भण्डारीले बताए । प्रहरीले उनको खोजी गरिरहेको छ ।
भारतबाट भैरहवाको सुनौली नाका हुँदै बोलेरोमा अमला लिएर पुस २९ गते काठमाडौँ आएका सवारी चालक भारतको बिहारका सनिककुमार सोमबार फर्किएका थिए ।
कालीमाटीस्थित काठमाडौँ सोलुसन ट्रेडर्समा अमला छाडेर उनी सोमबार त्यहाँबाट सुनौली नाका हुँदै भारत जान बाटो लागेका थिए ।
मङ्गलबार बिहान ४:४० बजेको समयमा चितवनको इच्छाकामना गाउँपालिका–५ मुग्लिन नारायणगढ सडकखण्डको ३ नम्बर पुल नजिक त्रिशुली नदीमा पानीभित्र गाडीको लाइट बलेको जस्तो छ भन्दै अपुष्ट सूचना प्रहरीलाई आएपछि प्रहरीले गाडी र यात्रुको खोजी गरेको थियो ।
