काठमाडौँ । नेकपा (मसाल) ले आगामी माघ ११ गते हुन गइरहेको राष्ट्रियसभा सदस्यको निर्वाचनमा गठबन्धनका उम्मेदवारलाई विजयी बनाउन आग्रह गरेको छ ।
महामन्त्री मोहनविक्रम सिंहको हस्ताक्षरमा २०८० पुस २८ गते शनिबार प्रेसवक्तव्य जारी गर्दै पार्टीले यस्तो आग्रह गरेको हो ।
प्रेसवक्तव्यमा गण्डकी र लुम्बिनी प्रदेशका केही जिल्लामा आफ्ना मतदाता रहेको उल्लेख गर्दै उहाँहरूलाई गठबन्धनको पक्षमा मतदान गर्न अनुरोध गरिएको छ ।
त्यस्तै वक्तव्यमा राष्ट्रिय जनमोर्चाकी उपाध्यक्ष तथा प्रवक्ता दुर्गा पौडेललाई राष्ट्रियसभामा महिला सदस्यको रूपमा मनोनित गर्न प्रस्ताव गरिएको उल्लेख छ ।
नेतृ पौडेललाई मन्त्रिपरिषद्ले निर्णय गरेर राष्ट्रपतिद्वारा मनोनित गरिने विश्वास मसालले लिएको वक्तव्यमा उल्लेख छ ।
यस्तो छ, प्रेसवक्तव्यको पूर्ण पाठ :
“नेकपा (मसाल) ले राष्ट्रियसभाको आगामी चुनावमा गठबन्धन पक्षधर सबै उम्मेदवारलाई विजय बनाउनका लागि सबै मतदातासित अपिल गर्दछ । गण्डकी र लुम्बिनीका केही जिल्लामा मात्र हाम्रा मतदाता हुनुहुन्छ । हामीले हाम्रा सबै मतदातासित गठबन्धनका सबै उम्मेदवारलाई विजय बनाउनका लागि मत हाल्न अनुरोध गर्दछौँ । त्यो बाहेक हाम्रा मतदाता नभएका अन्य प्रदेशमा पनि गठबन्धनका उम्मेदवारलाई मत हालेर विजय बनाउनका लागि सबै मतदातासित अनुरोध गर्दछौँ ।
हामीले राष्ट्रिय जनमोर्चाकी उपाध्यक्ष र प्रवक्ता का. दुर्गा पौडेललाई राष्ट्रपतिद्वारा मनोनित हुने राष्ट्रियसभाको महिला सदस्यका लागि प्रस्तावित गरेका छौँ । त्यो पद मन्त्रिपरिषद्ले निर्णय गरेर राष्ट्रपतिद्वारा मनोनित हुने पद भएकाले सरकार र राष्ट्रपतिद्वारा पनि उहाँलाई राष्ट्रियसभामा नियुक्त गरिने छ भन्ने हामीले आशा गरेका छौँ ।”
