तमघासबजार । गुल्मी जिल्लाको कालीगण्डकी गाउँपालिकामा अखिल नेपाल किसान महासङ्घ (अप्फा) को पालिका समिति गठन भएको छ ।
केन्द्रीय अध्यक्ष भैरवराज रेग्मीको प्रमुख आतिथ्यमा २०८० पुस २४ गते मङ्गलबार पुर्तिघाटमा सम्पन्न भेलाले सो समिति गठन गरेको हो ।
भेलाले घनश्याम ढकाल अध्यक्ष रहनुभएको अप्फाको पालिका समिति गठन गरेको छ ।
समितिको उपाध्यक्षमा मुना ढकाल, सचिवमा युवराज श्रीस, सहसचिवमा खेमबहादुर पुन र कोषाध्यक्ष अन्जना पुन रहनुभएको छ ।
त्यस्तै, सदस्यहरूमा गुरुदत्त ढकाल, टेकबहादुर श्रीस, कृष्णबहादुर पुन, राजु थापा, मोती पुन र टीकाराम थापा रहनुभएको छ ।
एवम् प्रकारले वैकल्पिक सदस्यहरूमा वीरेन्द्र अर्याल, भूमिश्वर नेपाली, कुमारी थापा र दिलबहादुर थापा रहनुभएको छ ।
सङ्गठनलाई वर्गसङ्घर्षसित जोडौँ
कार्यक्रममा प्रमुख अतिथिको आसनबाट मन्तव्य राख्दै रेग्मीले किसान सङ्गठनलाई वर्गसङ्घर्षसित जोड्नुपर्ने आवश्यकतामा जोड दिनुभयो ।
उहाँले भन्नुभयो– ‘किसानको सङ्गठनलाई उत्पादनसँग मात्रै होइन, वर्गसङ्घर्षसँग पनि जोडनुपर्दछ ।’
केन्द्रीय समितिले जिल्ला र पालिका स्तरको सङ्गठनलाई सामूहिक उत्पादन र वितरणतर्फ अगाडि बढाउने योजना बनाएको उहाँले जानकारी दिनुभयो ।
‘किसानहरू कृषि सहकारीको माध्यमबाट अगाडि बढ्नुपर्ने निष्कर्ष अप्फाको केन्द्रीय समितिले लिएको छ’ उहाँले भन्नुभयो– ‘केन्द्रीय र स्थानीय सरकारले कृषिलाई पहिलो प्राथमिकता नदिए किसानको वर्गसङ्घर्ष उठाउनुपर्ने आवश्यकतामा पनि हामीले जोड दिन्छौँ ।’
राज्यले कृषिक्षेत्रलाई उपेक्षा गरेको बताउँदै अध्यक्ष रेग्मीले आफूहरूले आफ्नो अधिकारको रक्षाका लागि आवाज उठाउँदै आएको बताउनुभयो ।
उहाँले भन्नुभयो– ‘किसान वर्गसङ्घर्षलाई अप्फाले नेतृत्व दिनुपर्दछ ।’
कार्यक्रममा मन्तव्य राख्दै नेकपा (मसाल) गुल्मीका प्रवक्ता ओमेन्द्र कुँवरले नयाँ जनवादी क्रान्तिले किसानको मुक्तिलाई अगाडि बढाउने दाबी गर्नुभयो ।
कार्यक्रममा राष्ट्रिय जनमोर्चाका केन्द्रीय सदस्य तथा गुल्मी जिल्ला अध्यक्ष रामकुमार क्षेत्री, रक्तिम सांस्कृतिक अभियानका केन्द्रीय सदस्य दीप गोले, अखिल नेपाल युवक सङ्घका जिल्ला अध्यक्ष भीमबहादुर थापा, राजमो जिल्ला सल्लाहकार गङ्गा केसी, राजमो कालीगण्डकी पालिका समितिका अध्यक्ष सूर्यबहादुर क्षेत्री, युवक सङ्घ कालीगण्डकी पालिका समितिका अध्यक्ष मेघराज शर्मा, कालिगण्डकी–६ का वडासदस्य हरिकला थापा, वडा नं. ५ का वडासदस्य मिथुल बलाल र अखिल नेपाल महिला सङ्घकी पालिका समितिकी सचिव चमेली शर्माको आतिथ्य रहेको थियो ।
बेलमाया श्रीसको अध्यक्षता, घनश्याम ढकालको सञ्चालन तथा अशोक पुनको स्वागत मन्तव्यका साथ उक्त कार्यक्रम सम्पन्न भएको थियो ।
