काठमाडौं । सर्लाहीको बरहथवामा प्रहरीको गोली लागी मृत्यु भएका जयशंकर साहको शवयात्रामा सयौं नागरिक सहभागी भएका छन् ।
Advertisement
उनको मृत्यु भएको चार दिनपछि आज (सोमबार) अन्तिम संस्कार हुँदैछ। शवयात्रामा सयौँ स्थानीय सहभागी भएका बरहथवा नगरपालिका–६ का वडाध्यक्ष मोहम्मद अफ्ताब आलमले जानकारी दिए।
स्थानीय प्रशासनसँग ११ बुँदे सहमति भएपछि आफन्त र आन्दोलनरत पक्षले गएराति साहको शव घटनास्थलबाट उठाएका थिए।
राति नै मलंगवास्थित प्रादेशिक अस्पतालमा पोष्टमार्टमपछि साहको शव परिवारजनले बुझेर बरहथवा–६ स्थित घर लगेका थिए।
गएको शुक्रबार दिउँसो स्थानीयको प्रदर्शनमा प्रहरीको गोली लागेर बरहथवा ६ का २७ वर्षीय जयशंकर साहको मृत्यु भएको थियो।
साहको बरहथवा १ स्थित बागमती नदी किनारमा अन्तिम संस्कार हुँदैछ।
