खलङ्गा । नेकपा (मसाल) जिल्ला समिति प्युठानले विश्व कम्युनिस्ट आन्दोलनका महान् नेता माओत्सेतुङको एक सय एकतिसौँ जन्मजयन्ती मनाएको छ ।
२०८० पुस १० गते मङ्गलबार तदनुसार डिसेम्बर २६, २०२३ का दिन सो कार्यक्रम सम्पन्न भएको हो ।
कार्यक्रममा बोल्दै प्रमुख अतिथि राष्ट्रिय जनमोर्चा लुम्बिनी प्रदेश अध्यक्ष बोमबहादुर खत्रीले समसामयिक राजनीति र विश्व कम्युनिस्ट आन्दोलनमा माओको योगदानलगायत विषयमा आफ्नो विचार राख्नुभएको थियो ।
सो अवसरमा उहाँले विश्व कम्युनिस्ट आन्दोलन रक्षात्मक अवस्थामा रहेको बताउँदै त्यसलाई आक्रामक रूपतर्फ फेर्न आत्मगत परिस्थिति बलियो बनाउनुपर्ने आवश्यकतामा जोड दिनुभयो ।
राजमो लुम्बिनी प्रदेश सल्लाकार सुरेश थापाको आतिथ्य रहेको सो कार्यक्रमलाई अखिल नेपाल जनजाति सम्मेलनका कावा अध्यक्ष अम्मरध्वज राना, अखिल नेपाल कानुन व्यवसायी सङ्घका उपाध्यक्ष विदुर मल्ल, अखिल नेपाल किसान महासङ्घ केन्द्रीय सदस्य ध्रुव थापा, अखिल नेपाल युवक सङ्घका केन्द्रीय सदस्य कमल पौडेल, अखिल नेपाल शिक्षक सङ्घ लुम्बिनी प्रदेश सचिव कल्याण खड्काले सम्बोधन गर्नु भएको थियो ।
जिल्ला प्रवक्ता राम पहाडीको अध्यक्षता रहेको उक्त कार्यक्रमको सञ्चालन राजमो जिल्ला सदस्य लालबहादुर राहुँले गर्नुभएको थियो ।
