काठमाडौं । दुबईबाट १४ किलो सुन ल्याउने गिरोहले १३८ केजी सुन नेपाल भित्र्याएको खुलेको छ ।
मंसिर २१ गते बिहीवार राति फ्लाइ दुबईबाट नेपाल आएका चन्द्र घलेको साथबाट १४ किलोग्राम सुन फेला पारेपछि बनेको छानबिन समितिले प्रतिवेदनले सो समूहको संलग्नतामा १३८ केजी सुन ल्याएको भन्ने प्रारम्भिक विवरण प्राप्त भएको जनाएको हो ।
विमानस्थल भन्सार प्रमुख टोकराज पाण्डेले १४ किलो सुन प्रकरणमा संलग्नहरुबिरुद्ध भन्सार ऐनअनुसार मुद्दा दर्ता हुने बताए । मंसिर २१ गते दुबईबाट ल्याएको १४ किलो सुनसहित पक्राउ परेका गोरखाका मिनबहादुर घलेबाट शुरु भएको अनुसन्धान हालसम्म ९ जना पक्राउ परेका छन् ।
उनीहरु सबैलाई २५ दिनभित्र भन्सार ऐनअनुसार मुद्दा दर्ता गर्ने पनि प्रमुख पाण्डेले बताए । उनले मंसिर २१ गते बिहीवार राति फ्लाइ दुबईबाट नेपाल आएका चन्द्र घलेको साथबाट भन्सार टोलीले १४ केजी सुन बरामदपछि सुनको छानबिन गर्नका लागि प्रमुख भन्सार अधिकृतको संयोजकत्वमा बनेको किमिटीले विमानस्थलमा समस्या, गर्नुपर्ने सुधारका विषयहरु औंल्याएको बताए ।
उनले केही सम्भाव्य अभियुक्तहरुको नामसमेत प्रतिवेदनले समेटेको बताए । संलग्न भएकाहरुलाई भन्सार ऐनले दिएको समयावधि (२५ दिन) भित्र मुद्दा दर्ता गर्ने पाण्डेको भनाई छ ।
फ्लाई दुबईको उडान नम्बर एफजेड–५७३ बाट राति ११ः४० बजे काठमाडौं उत्रेका घलेलाई विमानस्थल भन्सारले पक्राउ गरेको थियो ।
पक्राउ पर्नेमा गोरखाका मिनबहादुर घले, गोरखाकै चन्द्र घले, स्याङ्जाका कृष्णकुमार श्रेष्ठ, काठमाडौं ८ का शेरबहादुर बस्नेत, नुवाकोटका लेकबहादुर तामाङ, काठमाडौं ८ का राधाकृष्ण श्रेष्ठ, काठमाडौंकै रमेश देउला, धादिङका अनिल श्रेष्ठ र लमजुङकी विना गुरुङ रहेका छन् ।
समितिले घलेले दुवईमा तथाकथित अंकित अग्रवाल नाम गरेको व्यक्तिसँग सम्पर्क राखी नेपालमा सुन तस्करी गर्न चाँजोपाँजो मिलाउने गरेको निष्कर्ष निकालेको छ । घले स्वयं तथा चन्द्र घले र कृष्णकुमार श्रेष्ठ समेतले पटक–पटक दुबईबाट सुन लिई आउने गरेको अनुसन्धानबाट खुल्न आएको समितिको भनाइ छ ।
समितिले अध्यागमन कार्यालयले पटक पटक दुबई, सिंगापुर, हङ्कङ, थाइल्याण्ड लगायतका देशमा आवागमन गरिरहेका यात्रुहरूको सूचना भन्सार तथा प्रहरीलाई दिने लिने व्यवस्था मिलाउनुपर्ने सुझाव दिएको छ ।
भीआईपी कक्षको सीसी क्यामेरा ‘आउट अफ सर्भिस’
१४ किलो सुनबारे मणिराम पौडेलको संयोजकत्वमा तयार भएको प्रतिवेदनमा अन्तर्राष्ट्रिय विमानस्थदको भीआईपी कक्ष जाने सीसी क्यामेरा ‘आउट अफ सर्भिस’ देखिएको उल्लेख छ।
छानबिन तथा अध्ययनमा सीसी टीभी फुटेज नै नभएका कारण सो क्षेत्रको अध्ययन नभएको पाइएको छ।
नागरिक उड्ययन कार्यालयद्वारा वितरण गरिएका पासहरूको मोबाइल नम्बर सहितको विवरण समेत प्राप्त हुन नसकेको उल्लेख छ।
त्रिभुवन अन्तर्राष्ट्रिय विमानस्थलको आगमन तर्फको पछिल्लो ३ महिनाको सीसी टीभी रेकर्ड माग गरिएकोमा ब्याकअपको सिमितताका कारण जम्मा पछिल्लो २१ दिन सम्मको मात्र रेकर्ड प्राप्त गर्न सकिएको हो । त्यसले समेत अध्ययनलाई निचोडमा पुर्याउन नसकेको प्रतिवेदनमा जनाइएको छ।
