काठमाडौँ । चार किसान सङ्गठनले प्याजमा भ्याट होइन, सहुलित वा सुविधा प्रदान गर्ने पारदर्शी नीति ल्याउन माग गरेका छन् ।
सरकारले भ्याट लगाएको भन्दै तरकारी बजारमा नेपाली आलुप्याज खरिद गर्न छोडेको समाचार आइरहेका बेला चार किसान सङ्गठनले यस्तो माग गरेका हुन् ।
२०८० मङ्सिर २२ गते शुक्रबार संयुक्त प्रेसवक्तव्य जारी गर्दै उनीहरूले तरकारी बजारमा कृत्रिम अभावको अन्त्य गरी उपभोक्तालाई चर्को मूल्यको मारमा पर्न नदिन सरकारको ध्यानाकर्षण गराएका छन् ।
प्रेसवक्तव्यमा अखिल नेपाल किसान महासङ्घ (अप्फा) का अध्यक्ष भैरवराज रेग्मी, अखिल नेपाल किसान महासङ्घ (क्रान्तिकारी) का अध्यक्ष सीताराम तामाङ, अखिल नेपाल किसान यूनियनका इ्रन्चार्ज लोकनारायण सुवेदी र अखिल नेपाल प्रगतिशील किसान सङ्घका अध्यक्ष दुर्गाप्रसाद जैसीको हस्ताक्षर रहेको छ ।
यस्तो छ, प्रेसवक्तव्यको पूर्ण पाठ :
“स्वदेशमा उत्पादित आलु र प्याजमा समेत भ्याट लगाएको भन्दै नेपाली किसानले उत्पादन गरेको आलुप्याज कालिमाटी तरकारी बजारका थोक बिक्रेताले नेपाली किन्न छोडेकाले बजारमा आलु र प्याजको कृत्रिम अभाव सिर्जना गरिएको र भारतबाट आयातित आलु र प्याजको उपभोक्ताले चर्को मूल्य तिर्नु परिरहेको छ भने अर्कोतिर, नेपाली किसान आलु बिक्री नभएर उनीहरू ठुलो मर्कामा परेको स्थितिप्रति हाम्रो गम्भीर ध्यानाकर्षण भएको छ ।
दैनिक उपभोगका नभई नहुने तरकारी आलु र प्याजलगायतका वस्तुको कृत्रिम अभाव र मूल्यवृद्धिप्रति सरकार बेखबर जस्तै बनेकाले किसान र उपभोक्ता दुबैले ठगिनुपरेको छ भने आयातित तरकारीको मूल्य आकाशिएको छ । यो स्थितिको अन्त्य गर्न, किसानले उचित लाभ पुग्ने गरी नेपाली किसानले उत्पादन गरेको सम्पूर्ण खरिद गर्ने व्यवस्था गर्न र कृत्रिम अभावको अन्त्य गरी उपभोक्तालाई चर्को मूल्यको मारमा पर्न नदिन कडा कदम चाल्न र स्वेदशी उत्पादनलाई प्रोत्साहित गर्न सहुलियत र सुविधा प्रदान गर्ने पारदर्शी र ठोस नीति ल्याउन र प्रभावकारी कार्यान्वयन गर्न हामी सरकारसँग जोडदार माग गर्दछौँ ।”
