काठमाडौँ । एसियन एलेक्टोरल स्टेकहोल्डर फोरमको छैटौँ सम्मेलन आगामी २०८० मङ्सिर २० र २१ गते काठमाडौँमा हुने भएको छ ।
निर्वाचन आयोग नेपाल र एसियन नेटवर्क फर फ्री इलेक्सन्सको आयोजनामा सो सम्मेलन हुन लागेको हो ।
आयोगका प्रवक्ता शालिग्राम शर्मा पौडेलले मङ्सिर ११ गते जारी गर्नुभएको प्रेसविज्ञप्तिका अनुसार सो सम्मेलनमा एसियाका निर्वाचन व्यवस्थापन निकाय र सम्बद्ध सरोकारवाला निकायका दुई सयभन्दा बढी उच्चस्तरीय प्रतिनिधिको सहभागिता रहने छ ।
सम्मेलनको उद्घाटन मङ्सिर २० गते उपप्रधान तथा गृहमन्त्री नारायणकाजी श्रेष्ठले र समापन मङ्सिर २१ गते परराष्ट्रमन्त्री एन.पी. साउदले गर्ने कार्यक्रम रहेको छ ।
वक्तव्यमा एसिया तथा प्रसान्त क्षेत्रका ४० देशका निर्वाचन व्यवस्थापन गर्ने निकायका प्रमुख तथा प्रतिनिधि, नागरिक समाज र निर्वाचनका विभिन्न आयाममा क्रियाशील गैरनाफामूलक तथा प्राज्ञिक सङ्घसंस्थाका प्रतिनिधिको सहभागिता रहने उक्त सम्मेलनको मुख्य नारा “दिगो लोकतन्त्रको निर्माण : निर्वाचन चुनौती र अवसरको सम्बोधन” रहेको छ ।
सो सम्मेलनमा नेपाललगायत अन्य मुलुकका विज्ञ व्यक्तित्वमध्ये बाट सातओटा विषयमा केन्द्रित रही २१ ओटा कार्यपत्र प्रस्तुत गरिने छन् ।
दुईदिने उक्त सम्मेलनबाट “ निर्वाचन सुधारमार्फत लोकतन्त्रलाई सुदृढ गर्न र निर्वाचनको अखण्डतालाई प्रवद्र्धन गर्न काठमाडौँ घोषणापत्र” जारी गरिने छ ।
फोरमको स्थापना सन् २०१२ मा थाइल्यान्डमा भएको थियो ।
