हेम बिजी ##

केही
उल्टा मान्छेहरू
हिँड्न खोज्दै छन् जङ्गली युगतिर
अर्थात्
दासयुगतिर
यो अघि बढिसकेको
गणतन्त्रको युगमा उभिएर
केही
उल्टा मान्छेहरू
हिँड्न खोज्दै छन् सामन्ती युगतिर
अर्थात्
मरिसकेको राजतन्त्र ब्युँताउन
असम्भव यात्रा खोज्दै छन्
सडकमा उफ्रिँदै
उल्टो यात्रा रोज्दै छन् ।

खोई
कसले बुझाइदेला
कसले बताइदेला
ए उल्टा मान्छेहरू हो ¤
तिम्रो यात्रा उल्टो भयो भनेर
किनकि
युगपछाडि फर्किदैन
समय पछाडि चल्दैन
र व्यवस्था पछाडि जाँदैन ।

आजकाल
केही उल्टा मान्छेहरू
हिँड्न खोज्दै छन् उल्टो यात्रा
अर्थात्
जनता दास बनाउन
निरङ्कुश अवतार निकाल्न
फेरि
लोकतन्त्र निल्न
र गणतन्त्र मिल्क्याउन
आजकाल
केही उल्टा मान्छेहरू
खोज्दै छन् उल्टो यात्रा
त्यसैले
खबरदार
ए उल्टा मान्छेहरू
हामी गणतन्त्र निल्न दिँदैनौँ
उल्टो यात्रा हिँड्न दिँदैनौ ।