काठमाडौँ । चीनको हाङझाउमा भएको उन्नाइसौँ एसियाली खेलकुद प्रतियोगितामा नेपाललाई रजतपदक दिलाउने कराते खेलाडी एरिका गुरुङ सम्मानित हुनुभएको छ ।
एसएस फाउन्डेसनद्वारा २०८० कात्तिक २७ गथते सोमबार आयोजित खेलाडी सम्मान कार्यक्रममा रजतपदक विजेता खेलाडी एरिकालाई सम्मान गरिएको हो ।
सम्मानस्वरूप उहाँले रु ३१ हजार पुरस्कार प्राप्त गर्नुभयो । एरिकाले गत असोजमा भएको उन्नाइसौँ एसियाली खेलकुद प्रतियोगिताअन्तर्गत महिला ६८ केजी तौल समूहमा नेपाललाई रजतपदक दिलाउनुभएको थियो ।
एसियाली खेलकुदको इतिहासमा नेपालका लागि एरिकाले तेस्रोपटक रजतपदक दिलाउनुभएको हो । त्यस्तै, एसियाली खेलकुदमा नेपालले कराँते खेलमा भने पहिलो रजतपदक जितेको थियो । यसअघि तेक्वान्दो खेलबाट सविता राजभण्डारी र प्याराग्लाइडिङ टिमले रजतपदक जितेको थियो ।
एरिकाले मिहिनेत गरे सफलता हासिल गर्न सकिन्छ भन्ने मनोबलले यो पदक दिलाएको भन्दै यस किसिमको सम्मानले आफूलाई थप हौसला प्राप्त भएको बताउनुभयो । उहाँले आगामी दिनमा खेल क्षेत्रमा अझ उत्कृष्ट खेल्ने प्रतिबद्धतासमेत व्यक्त गर्नुभयो ।
कार्यक्रममा कराते खेलका मुख्य प्रशिक्षक कुशल श्रेष्ठ पनि सम्मानित हुनुभयो । सम्मानस्वरुप उहाँले रू ३१ हजार प्राप्त गर्नुभयो । उहाँले नेपाली खेलाडीको रगतमा साहस र वीरताको प्रतिक रहेको भन्दै मार्सल आर्ट खेलले सफलता भित्र्याउँदै आएको बताउनुभयो ।
