काठमाडौँ । मुगुमा एकै परिवारका चार जनाको हत्या भएको छ ।
छायानाथ रारा नगरपालिका–६ मुन्दु गाउँमा एकै घरका चार जनाको धारिलो हतियार प्रयोग गरी हत्या भएको हो ।
२८ वर्षीया श्रीदेवी बोहोरा, ११ वर्षीय छोरा मनोज, ८ वर्षीया छोरी छिता र ७ महिने छोरा रहरको हत्या भएको प्रहरीले जनाएको छ ।
८ गते बिहानदेखि ताला लगाएको देखेपछि छिमेकीले २०८० कात्तिक १० गते शुक्रबार बिहान ९ बजेतिर ढोका खोल्दा चारै जनाको विभत्स रूपले हत्या भएको अवस्थामा गाउँलेहरूले देखेका थिए। त्यसपछि गाउँलेले प्रहरीलाई खबर गरेका थिए ।
खबर पाएलगत्तै जिल्ला प्रहरी कार्यालय र पिना प्रहरी चौकीबाट प्रहरी टोली घटनास्थल पुगेको थियो । प्रहरीले घटना दुई दिन अगाडि भएको अनुमान गरेको छ ।
प्रहरीले घटनास्थललाई घेरा हालि अनुसन्धानको प्रक्रिया अगाडि बढाएको जिल्ला प्रहरी कार्यालय मुगुका डीएसपी वीरेन्द्र थापाले जाकारी दिए । शव पोस्टमार्टमका लागि जिल्ला अस्पताल पठाइएको उनले बताए ।
हत्या गरिएकी महिलाको लगाएको गहनासमेत निकालिएकोले धनमालसमेत चोरी भएको हुन सक्ने प्रहरीले जनाएको छ ।
महिलाका पति एक वर्षदेखि बैदेसिक रोजगारमा देशबाहिर छन् ।
