काठमाडौँ । काठमाडौँमा जारी त्रिकोणात्मक टी–२० शृङ्खलामा नेपालले युएईलाई ५ विकेटले पराजित गरेको छ ।
२०८० कात्तिक ६ गते सोमबार युएईले दिएको १६५ रनको लक्ष्य नेपालले पाँच विकेट गुमाएर १९.२ ओभरमा भेटाएको हो ।
नेपालका लागि आशिफ शेखले २ छक्का र ६ चौका मदतमा ६२ रनको योगदान गरे । कप्तान रोहित पौडेल ४७ रनमा आउट भए । दीपेन्द्रसिंह ऐरी १५ बलमै एक छक्का र ६ चौका प्रहार गर्दै ४० रनमा अविजित रहे ।
आजको खेलमा आशिफबाहेक पहिलो क्रमका ब्याट्सम्यान भने चलेनन् । कुशल भुर्तेल एक, सोमपाल कामी दुई र कुशल मल्ल शून्य रनमै आउट भए ।
युएईका मोहम्मद जवादुल्लाहले २, अकिफ राजा र जहूर खानले एक÷एक विकेट लिएका थिए । यसअघि टस हारेर पहिले ब्याटिङ गरेको युएईले ७ विकेट गुमाएर १६४ रन बनाएको थियो ।
युएईका लागि वृत्य अरविन्द र बासिल हमीदले समान ४५ ÷४५ रन बनाएका थिए । त्यस्तै, आसिफ खान १८, खालिद शाह १२, अलिशान शराफु ९, अल नासिर ९ र मोहम्मद वासिम ८ रन बनाएर आउट भए । निलान्स केश्वानी ८ र अकिफ राजा ५ रनमा अविजित रहे ।
नेपाली टिमका सोमपाल कामी र अविनाश बोहोराले २÷२ विकेट लिए भने करण केसी र गुल्शन झाले एक÷एक विकेट लिए ।
यस शृङ्खलामा नेपाल यो खेलअघि नै फाइनलमा प्रवेश गरिसकेको थियो । हङकङसमेत सम्मिलित शृङ्खलामा नेपालले सतप्रतिशत जितसहित फाइनलसम्मको यात्रा तय गरेको हो ।
