दीप गोले ##

प्रत्येक वर्ष झैँ यसपालि पनि
दसैँ आयो भन्दै
सबै जना सामाजिक सन्जालभरि
शुभकामनाको आदानप्रदान
पोष्ट गरेर
खुसियालीको रौनक छुट्टै बोकेर
फेरि दसैँ भित्रियो

दसैँ सँगसँगै
साहुको ऋण बोकेर
हरेक झुपडीभित्र
पिरव्यथा र दु:ख भित्रिएको छ
हरेक वर्ष
घरवार खोसिएको छ
खै यो कस्तो दसैँ ?
दसैँ त विजयोल्लास हो भनेर सुनेका थिए
आज हारको उल्लास भएको छ
कहिले भित्रिने हो
दसैँ दसैँ बनेर गरिबीका झुपडीभित्र ?

हरेक वर्ष
हरेक महिना
हरेक दिन
हरेक घण्टा
परदेशिएका परदेशीको घरमा दसैँ
भित्रिएको छैन
आफ्ना बाआमा परिवार साथीभाई
इष्टमित्रका साथमा बसेर
दसैँ मनाउने दिन कहिले आउला ?

दसैँ त सत्तावालालाई
राष्ट्रपतिलाई आएको छ
प्रधानमन्त्रीलाई आएको छ
मन्त्रीलाई आएको छ
सांसदलाई आएको छ
मुख्यमन्त्रीलाई आएको छ
कर्मचारीलाई आएको छ

कहाँ छ खै दसैँ
हरेक दिन गिट्टी कुटेर जीवन गुजार्नेलाई
हरेक दिन आरानमा बसेर फलाम पिट्नेलाई
हरेक दिन च्यात्तिएको कपडा सिलाउनेलाई
हरेक दिन सडकको छेउमा जुत्ता सिउनेलाई
हरेक दिन ज्यालादारी गर्नेलाई

दसैँ तिमी दसैँ जस्तै बनेर
आउने भए
साहुमहाजनको घरमा मात्र हैन
झुपडीभित्र पनि खुसी लिएर आउनू

२०८० कात्तिक ५ गते
पौराई, रौतहट