बागलुङबजार । बागलुङको बरेङ गाउँकार्यपालिकाको त्रिहत्तरौँ बैठक सम्पन्न भएको छ ।
२०८० असोज २० गतेत शनिबार यसभन्दा अगाडिका बैठकबाट भएका निर्णय कार्यान्वयनको समीक्षा गर्दै सम्पन्न गरेको हो ।
गाउँ कार्यपालिकाका अध्यक्ष कृष्णप्रसाद शर्माको अध्यक्षतामा बसेको बैठकले नजिकिएको चाडपर्वको मध्यनजर गर्दै असोज २५ गते बिहीबार गाउँपालिकाभरि श्रमदान गरी बृहत् सरसफाइ अभियान सम्पन्न गर्न आह्वान गरेको छ ।
चाडपर्वको समयमा परम्परागत रूपमा चलिआएको सडक तथा गोरेटो बाटो खानेपानीका धारालगायत स्कुल, सरकारी तथा गैरसरकारी सङ्घसंस्थाका कार्यालय, आफ्नो घरवरिपरि सरसफाइका कार्य केही वर्षयता घट्दै गएकाले सम्पूर्ण बरेङवासी जनप्रतिनिधि, कर्मचारी, सरकारी तथा गैरसरकारी सङ्घसंस्था, क्लब, आमा समूह र सरोकारवाला सबैको अगुवाइमा सकृय सहभगिता गरी सरसफाई अभियान सञ्चालन गर्ने निर्णय गरेको बताइएको छ ।
त्यस्तै, सबै वडाका मुख्य सडकहरू चाडपर्व अगाडि नै नागरिकलाई सहज आवतजावत हुने गरी सरसफाइ गर्ने, गाउँपालिका सबै सामुदायिक विद्यालयका अति आवश्यक मर्मत सम्भार गर्ने गरी सङ्घीय विशेष अनुदानअन्तर्गत सवै विद्यालयमा आवश्यक भौतिक सामग्रीको मर्मत तथा व्यावस्थापन गर्ने, गाउँपालिका रिङरोड, बाटाकाचौर, सल्यान, सुखौरा मोटरबाटो स्तरोन्नतिलगायतका योजना प्राविधिक लागत कार्य योजना तयार गर्ने र तत्काल टेन्डर प्रकृया गरी योजना कार्यान्वयन गर्ने पनि बैठकले निर्णय गरेको जानकारी दिइएको छ ।
बैठकले चालु आर्थिक वर्ष २०८०/८१ को योजना कार्यान्वयन गर्न मङ्सिर मसान्तको समयसीमा तोकी समिति गठनको कार्य सम्पन्न गर्ने र योजना सम्झौता गरी चैत मसान्तसम्म योजना सम्पन्न गर्नुपर्ने निर्णय गरेको छ ।
गाउँ शिक्षा समितिबाट प्राप्त सुझाव बैठकले निर्णय पास गरी अनुमोदन, भगिीन तथा सार्वजनिक भवनको व्यवस्थापन गर्न बनेको कार्यविधि पास गर्ने साथै सर्वोदय माध्यामिक विद्यालयको भवन बहुवर्षे योजनाको वजेट व्यवस्थापन गर्नेसमेत बैठकले निर्णय गरेको बरेङ गाउँपालिका प्रवक्ता तुफान पुनले जानकारी दिनुभयो ।
