काठमाडौँ । कतार नेपाली एकता समाजले स्पाइनल क्यान्सरपीडित कमल रोकालाई २३ हजार तीन सय रुपियाँ आर्थिक सहयोग गरेको छ ।
कतार नेपाली एकता समाजका सचिवालय सदस्य खिम बुढा र अन्तर्राष्ट्रिय नेपाली एकता समाजका कार्यालय सचिव प्रकाश थापामगरको उपस्थितिमा २०८० असोज २१ गते आइतबार सो रकम हस्तान्तरण गरिएको हो ।
काभ्रेको भैँसेपाटीस्थित स्पाइनल इन्जरी पुनस्र्थापना केन्द्रमा पुगी बिरामी रोकालाई नै उक्त रकम हस्तान्तरण गरिएको थियो ।
रकम बुझ्दै पीडित रोकाले युगदर्शनसित भन्नुभयो– ‘मलाई अस्पतालमा देखेकै भरमा यति आर्थिक सहयोग गरिदिनुभयो । यो ठुलो कुरा हो ।’
उहाँले सहयोग गर्नुभएकोमा कतार नेपाली एकता समाजलाई धन्यवाद ज्ञापन पनि गर्नुभयो ।
बिरामी रोका सन् २०१८ मा कतार पुग्नुभएको थियो । कतारमै कार्यरत रहेका बेला उहाँमा ब्रेन ट्युमर देखिएपछि गत सेप्टेम्बर २३, २०२३ तदनुसार २०८० असोज ६ गते नेपाल फर्कनुभएको थियो ।
सुरुमा भक्तपुर क्यान्सर अस्पतालमा उपचार गराएपछि सोही अस्पतालले काभ्रेस्थित पुनस्र्थापना केन्द्र रेफर गरेको थियो । हाल उहाँ सोही अस्पतालमा फिजियोथेरापी गराइरहनुभएको छ ।
उहाँका भाइ दिनेश रोकाका अनुसार फिजियोथेरापीपछि उहाँको स्वास्थ्यमा सुधार आइरहेको छ ।
