तौलिहवा । कपिलवस्तुको विजयनगर गाउँपालिकाअन्तर्गत वडा नं. ५ को वडाभेला सम्पन्न भएको छ ।
२०८० असोज २० गते शनिबार बाघमरुवामा राजमो कपिलवस्तुका सचिव केरसिंह अदैको प्रमुख आतिथ्यमा सो भेला सम्पन्न भएको हो ।
भेलाको उद्घाटनपछि मन्तव्य राख्दै प्रमुख अतिथि अदैले राष्ट्रिय जनमोर्चा जनताको वैकल्पिक शक्ति भएर आएको बताउनुभयो ।
उहाँले राष्ट्रियताको रक्षा र शोषितपीडित जनताका लागि सङ्घर्ष गर्ने, पार्टी राष्ट्रिय जनमोर्चा मात्र भएको पनि बताउनुभयो ।
सुशीलादेवी चौधरीको अध्यक्षतामा अघि बढेको उक्त भेलामा राजमो विजयनगर पालिका समितिका अध्यक्ष गोविन्द परियार, राजमो जिल्ला सदस्य त्रिवेणी कुर्मी, अखिल नेपाल महिला सङ्घकी मनिषा कोरी, राजमो वडा नं. ७ समितिका अध्यक्ष रामसमारे धोबी, राजमो वडा नं. ६ समितिका पटेश्वरी यादवले शुभकामना मन्तव्य राख्नुभएको थियो ।
भेलाको सञ्चालन नागराज योगीले गर्नुभएको थियो भने स्वागत मन्तव्य सूर्यबहादुर जिसीले गर्नुभएको थियो ।
भेलापछि बसेको बैठकले राजमो सदस्यता वितरण गर्ने, गाउँ कमिटी गठन गर्ने तथा प्रशिक्षण कार्यक्रमसमेत सम्पन्न गर्ने निर्णय गरेको प्राप्त समाचारमा उल्लेख छ ।
