खलङ्गा । नेकपा (मसाल) का सदस्य एवम् राष्ट्रिय जनमोर्चा झिमरुक गाउँपालिका वडा नं. ४ का अध्यक्ष हिक्मतसिंह खत्रीक्षेत्री “दर्पण” को हिजो २०८० असोज १० गते राती ७४ वर्षको उमेरमा असमायिक निधन भएको छ ।
असोज ११ गते बिहान गर्तङ खोलामा भएको अन्तिम श्रद्धाञ्जली कार्यक्रममा उहाँको पार्थिव शरीरमा नेकपा (मसाल) का लुम्बिनी प्रदेशका प्रवक्ता तिलक जिसीले पार्टीको झन्डा ओढाएर श्रद्धाञ्जली प्रकट गर्नुभएको थियो ।
त्यसैगरी, लुम्बिनी प्रदेश सल्लाहकार वासुदेव पोख्रेलले राजमोको झन्डा ओढाउनुभएको थियो ।
श्रद्धाञ्जली कार्यक्रममा अखिल नेपाल किसान महासङ्घका सचिव वीरबहादुर जिसी, अखिल (छैठौं) का महासचिव सुवाश जिसी, राजमो जिल्ला सल्लाहकार तथा झिमरुक अध्यक्ष टीका जिसी, वडा नं. ४ का अध्यक्ष सीताराम पोख्रेल, राजमो झिमरुकका सल्लाहकार सिद्दिमान जिसी, नेपाली काङ्ग्रेसका दानबहादुर जिसी, नेकपा (एमाले) का चन्द्रमणि खनाल, नेकपा (माओवादी केन्द्र) का प्रेम पुन, अखिल नेपाल शिक्षक सङ्घका थानेश्वर पन्थी, नेपाल शिक्षक सङ्घका जगत केसी, अखिल नेपाल युवक सङ्घका लिमानसिंह जिसीलगायतका स्थानीयको सहभागिता रहेको थियो ।
श्रद्धाञ्जली कार्यक्रममा बोल्दै प्रवक्ता तिलक जिसीले हिक्मत पार्टीको अत्यन्तै सरल र सादा नेता भएको बताउनुभयो ।
उहाँले भन्नुभयो– ‘उहाँ पार्टीप्रति अत्यन्तै प्रतिबद्ध हुनुहुन्थ्यो । उहाँ पञ्चायत विरोधी आन्दोलनको महत्वपूर्ण योद्धा हुनुहुन्थ्यो । उहाँको पार्टी, समाज र देशमा प्रजातान्त्रिक आन्दोलनमा महत्वपूर्ण भूमिका रह्यो । उहाँको निधनले पार्टीलाई अपूरणीय क्षति भएको छ ।’
२००६ साल कात्तिक २३ गते प्युठानको बाङ्गेमरोठमा जन्मनुभएका क्षेत्रीले फरिदावादमा अखिल भारत नेपाली एकता समाजबाट कम्युनिस्ट आन्दोलनमा सहभागी हुनुभएको थियो । २०४६ सालमा नेपाल फर्केर उहाँले पञ्चायत विरुद्धको आन्दोलनमा सक्रिय सहभागी हुनुभयो । पञ्चायत विरुद्धको आन्दोलनमा तत्कालीन सरकारले निर्घात यातना दिएका हिक्मत त्यति बेलादेखि नै मेरुदण्डको बिमारी हुनुहुन्थ्यो । हाल उहाँ मेरुदण्डको क्यान्सरबाट पीडित हुनुहुन्थ्यो ।
उहाँ अखिल नेपाल किसान महासङ्घ (अप्फा) को प्युठान जिल्ला अध्यक्ष पनि हुनुभएको थियो ।
उहाँको श्रीमती, ३ छोरा र २ छोरी हुनुहुन्छ ।
