महेन्द्रनगर । कञ्चनपुरको दक्षिणी क्षेत्रमा भारतले सीमा अतिक्रमण गरी बनाएको जंगे पिलर स्थानीयले तोडेका छन् । बेलडाँडी गाउँपालिका–३ बैवाहमा भारतले निर्माण गरेको ७८३-४ नम्बरको नेपाल–भारत सीमा–स्तम्भ स्थानीयले तोडेका हुन् ।
नेपालीको लालपुर्जावाला जमिनमा बनाइएको सीमा स्तम्भ स्थानीयले हतौडा र ढुंगाले हानेर शनिबार फुटाएका हुन् । सो स्तम्भ केही दिनअगाडि नेपाल–भारत संयुक्त सर्भे टोलीले निर्माण गरेको थियो।
लालपुर्जा भएको जमिनमा भारतले एकपक्षीय रूपमा सीमा–स्तम्भ बनाएर नेपाली भूमि अतिक्रमण गर्न खोजेको भन्दै स्थानीय नेपालीले विरोध गरेपछि सर्भे रोकिएको थियो। ६ दशकदेखि बसोबासरत स्थानीय नेपालीको जमिन भारतमा परेपछि सीमा विवाद चुलिएको छ।
सरकारले नेपालीको जमिन र देशको सीमा सुरक्षा गर्न नसकेको भन्दै स्थानीय आक्रोशित बनेका छन् । नेपाल सरकारले उपलब्ध गराएको दर्ता जग्गा समेत भारतमा पर्ने गरी सीमा सर्भे टोलीले सीमा स्तम्भ राख्न थालेपछि सीमा क्षेत्रका नागरिक चिन्तित र आक्रोशित बनेका हुन् ।
सीमा सर्वेका नाममा बृटिस -नेपालमा स्थापित जंगे पिलरहरुको आधारमा नगरी २०६०/०६१ सालमा गाडिएका स्तम्भका आधारमा अहिले नक्सांकन गर्न थालिए पछि थप नयाँ स्थानमा समेत सीमाको विवाद बढ्दै गएको छ ।
यसअघि विगतमा कुनैपनि विवाद नदेखिएका क्षेत्रहरुमा सर्भे टोलीले काम गर्ने क्रममा विवाद देखिन थालेको हो ।
