जुमानसिंह केसी, प्युठान ।
नेपाल कम्युनिष्ट पार्टी प्युठानका संस्थापक तथा नेकपा (मसाल)का नेता खगुलाल गुरुङको तेस्रो स्मृतिसभा गौमुखी गाउँपालिकाको नारिकोटमा सम्पन्न भएको छ।
राष्ट्रिय जनमोर्चा गौमुखी पालिका समितिको आयोजनामा स्मृतिसभा गरिएको हो ।
स्मृति सभामा गुरुङलाई एक हक्की र सर्वहारा वर्गको निम्ति लगातार आन्दोलनमा होमिएको महान् व्यक्तिका रुपमा स्मरण गरियो ।
कार्यक्रमका प्रमुख अतिथि नेकपा (मसाल)का लुम्बिनी प्रदेश प्रवक्ता तिलक जिसीले गुरुङ पञ्चायतकालदेखि नेपाली जनताको पक्षमा संघर्ष गर्दै आएको एक महान व्यक्ति भएको भन्दै उहाँले अंगालेका विचारलाई सबैले आत्मसात गर्नुपर्ने बताउनु भयो ।
उहाँले भन्नुभयो, ‘कुनै स्वार्थबिना पार्टीको नीतिमा अडिग रही प्युठानी तथा नेपाली जनताको हक अधिकारको लागि जीवनभर लडिरहेको इतिहास छ । त्यसैले उहाँको सपना पूरा गर्न समाजका सबै सचेत वर्गले ध्यान दिन सकेमा मात्र उहाँको वास्तविक स्मृतिसभा हुन सक्ने छ ।’
राष्ट्रिय जनमोर्चा प्युठानका अध्यक्ष ज्ञामुराम न्यौपानेले प्युठानको किसान आन्दोलन लगाएत सामन्तहरुको हालिमुहाली तोड्नमा गुरुङको महत्त्वपूर्ण भूमिका रहेको बताउनु भयो ।
उहाँले गाउँगाउँमा जनतालाई सास्ती दिने मुख्य जिम्माल सामन्तहरुको विरुद्धमा नेतृत्वदायी भूमिका निर्वाह गरी लडेको इतिहासबारे उल्लेख गर्नु भयो।
एकसय तीन वर्ष सम्मको उमेरमा पनि सँधै लेख्ने, पढ्ने र देशको चिन्ता गरिरहेको स्मरण गराउँदै त्यस्ता महान आदर्श पुरुषबाट सबै पार्टी, आम कार्यकर्ता तथा सचेतवर्गले सिक्न जरुरी रहेको बताउनु भएको थियो।
खगुलाल गुरुङ नेकपा मसालका महामन्त्री तथा कम्युनिस्ट नेता मोहनविक्रम सिंहका एक विश्वासपात्र हुनुहुन्थ्यो । हरेक आन्दोलनका कार्यक्रम सिंह र गुरुङको आपसी सल्लाहबाट तय हुने गरेको नेकपा मसाल प्युठानले जनाएको छ।
कार्यक्रममा विभिन्न पार्टीका नेताहरुले खगुलाल गुरुङले गरेका सकारात्मक कार्यको चर्चा परिचर्चा गरेका थिए ।
जनताको न्यायका लागि लड्दा उहाँलाई पञ्चायतकालमा प्रहरीले गिरफ्तार गरेको थियो । उहाँ प्युठान, सल्यान र पाल्पामा गरि एकवर्ष कारागारमा बस्नु परेको थियो।
स्मृतिसभामा राष्ट्रिय जनमोर्चा, नेपाली कांग्रेस, एमाले, माओवादी केन्द्रका नेता, कार्यकर्ता, स्थानीय जनप्रतिनिधि, शुभचिन्तक, घरपरिवारका सदस्य लगाएतको उल्लेखनीय सहभागिता रहेको थियो।
राष्ट्रिय जनमोर्चा गौमुखी गाउँपालिका समितिका अध्यक्ष जनक केसीको अध्यक्षतामा सम्पन्न कार्यक्रमको सञ्चालन नेता वीरबहादुर केसी र पालिका सदस्य हुकुमबहादुर थापाले स्वागत गर्नुभएको थियो ।
