काठमाडौँ । अखिल नेपाल महिला सङ्घकी अध्यक्ष मीना पुनले आफूहरूले सही राजनीति स्थापना गर्नका लागि तिजलाई उपयोग गरिरहेको बताउनुभएको छ ।
महिला सङ्घ काठमाडौँ जिल्ला समितिको आयोजनामा २०८० भदौ २८ गते कपन–ज्योतिनगरमा आयोजित प्रगतिशील तिजी कार्यक्रमलाई सम्बोधन गर्दै उहाँले यस्तो बताउनुभएको हो ।
‘तिजको नाममा विभिन्न प्रकारका विकृति, विसङ्गति छन्’ उहाँले भन्नुभयो– ‘हामी सबै खाले विकृति, विसङ्गति र फजुल खर्चको विरोधमा छौँ ।’
उहाँले तिजको सांस्कृतिक पक्षसँगै आफूहरूको ध्यान राजनीतिक विषयतर्फ रहेको बताउनुभयो ।
‘हामी राजनीतिक विषयलाई महत्त्व दिन्छौँ’ उहाँले भन्नुभयो– ‘हामी सही अर्थात् क्रान्तिकारी राजनीति स्थापना गर्नका लागि तिजको प्रगतिशील उपयोग गरिरहेका छौँ ।’
अध्यक्ष पुनले तिजी कार्यक्रममार्फत् बढीभन्दा बढी जनताको माझमा जाने महिला सङ्घको प्रयत्न रहेको बताउनुभयो ।
‘तिजी कार्यक्रममा उत्पीडित महिलाहरूको पनि व्यापक सहभागिता हुन्छ । हामी त्यो महिला सहभागितालाई सही राजनीति प्रचारको रूपमा अगाडि बढाउन चाहन्छौँ’ उहाँको भनाइ थियो ।
कार्यक्रममा वामपन्थी नेता आनन्द शर्माको विशेष आतिथ्य रहेको थियो ।
सो अवसरमा राष्ट्रिय जनमोर्चाका केन्द्रीय कोषाध्यक्ष मधु क्षेत्री, केन्द्रीय सदस्यहरू लक्ष्मी केसी, पियारी थापा, सुधा शर्मा, अखिल नेपाल युवक सङ्घका सल्लाहकार रमेश पौडेल, रक्तिम सांस्कृतिक अभियानका केन्द्रीय सदस्य मेस्मा पुनलगायतको आतिथ्य रहेको थियो ।
महिला सङ्घकी जिल्ला अध्यक्ष ऋतु केसीको अध्यक्षता तथा सचिव सुशीला बन्जाडेको सञ्चालनमा उक्त कार्यक्रम सम्पन्न भएको थियो ।
उपर्युक्त औपचारिक कार्यक्रमपछि महिलाहरूले सांस्कृतिक कार्यक्रम सम्पन्न गरेका थिए ।
