काठमाडौं । धरान उप महानगरपालिकाका मेयर हर्क साम्पाङसँग सवाल–जवाफ गर्दा एक युवक हिरासतमा पुगेका छन् । मेयर साम्पाङलाई प्रश्न सोध्ने अशोक लिम्बुलाई उनले नगर प्रहरी लगाएर प्रहरीको हिरासत पठाएका हुन् ।

आफूसँग मुखमुखै लागेको भन्दै मेयर साम्पाङले हिरासतमा पुर्‍याएका लिम्बु भने वडाअध्यक्षको पहलमा शनिबार साँझ नै रिहा भएका छन्।

गत शुक्रबार डेंगीविरुद्ध अभियान सञ्चालन गर्दै धरान–१५ पुगेका मेयर साम्पाङलाई अशोकले आफ्नो वडाका नागरिकका वास्तविक समस्यामा चाहिँ ध्यान नदिएको अन्य विषयमा अभियान सञ्चालन गरेर फोटो मात्रै खिचाएको भनी आलोचना गरेपछि उनलाई नगर प्रहरी लगाएर पक्राउ गरिएको थियो।

धरान उपमहानगर वडा नम्बर १५ का बासिन्दा लिम्बुलाई वडाध्यक्ष नरेश इवारामको पहलमा छुटाइएको हो।

मेयर साम्पाङसँग सवालजवाफ गरेको बाहेक अशोकविरुद्ध कुनै लिखित उजुरी नपरेको उनले बताए।