बागलुङबजार । बागलुङको ढोरपाटनमा अखिल नेपाल राष्ट्रिय स्वतन्त्र विद्यार्थी युनियन (छैठौं) को प्रथम ढोरपाटन नगर भेला सम्पन्न भएको छ ।
केन्द्रीय सदस्य विमल खरेलको प्रमुख आतिथ्यमा २०८० भदौ २१ गते बिहीबार सो भेला सम्पन्न भएको हो ।
भेलालाई सम्बोधन गर्दै उहाँले विद्यार्थी सङ्गठनलाई सशक्त बनाउँदै राज्यपक्षबाट हुने विद्यार्थीमाथिको अन्याय–अत्याचार, दमन, हिंसा, शोषणका विरुद्धमा आवाज उठाउनुपर्ने बताउनुभयो ।
उहाँले सङ्गठनले आफनो सङ्घर्षशील यात्रा अविच्छिन्न रूपमा स्थापनाकालदेखि नै अगाडि बढाउँदै महत्त्वपूर्ण भुमिका निर्वाह गरिरहेको दाबी गर्नुभयो ।
भेलामा राष्ट्रिय जनमोर्चाका केन्द्रीय सदस्य गौरिश्वर पाण्डेले प्रशिक्षण दिँदै विद्यार्थीले आफनो हकहितको लागि आफै नलागेसम्म उपलब्धि प्राप्त गर्न नसकिने र राजनीतिक रूपमा चेतना माथि उठाउने नसकिने बताउनुभयो ।
भेलाले दीपेन्द्र छन्त्याल अध्यक्ष रहनुभएको नौ पूर्ण, चार वैकल्पिक र दुई सल्लाहकार गरी १५ सदस्यीय नगर समिति गठन गरेको छ ।
समितिको उपाध्यक्षमा तिर्सना घर्ती, सचिवमा धनबहादुर पुन, सहसचिवमा मोहित घर्ती र कोषाध्यक्षमा बिना विक रहनुभएको छ ।
त्यस्तै, सदस्यहरूमा सम्झना क्षेत्री, सल्जिन क्षेत्री र मीना पाण्डे तथा वैकल्पिक सदस्यहरूमा सिर्जना सुनार, विवशा छन्त्याल र योगेश पुन रहनुभएको छ ।
भेलाले सल्लाहकारमा तेजिन्द्र पुन र केशव सिर्पालीलाई चयन गरेको छ ।
नवनिर्वाचित समितिलाई जातीय समता समाज केन्द्रीय सदस्य तथा जिल्ला अध्यक्ष नरबहादुर सुनारले बधाई दिनुभएको थियो ।
कार्यक्रम तेजिन्द्र पुनको अध्यक्षता, दीपेन्द्र छन्त्यालको स्वागत र केशव सिर्पालीको सञ्चालनमा सम्पन्न भएको थियो ।
