हेम बिजी ##

तिजको भाका सुनाउँछु भदौरे झरीलाई
देश लुटेर नेताले खाए बरीलाई

सुनपैसा गाडी अनि काठमाडौँमा महल
धनी भए नेता जति जनता कङ्गाल

नक्कली शरणार्थी प्रमाणपत्र थमाउने
अमेरिकी डलरमा पैसा कमाउने

नेपालीलाई भुटानी बनाउँदै बेचेका
ललितानिवास खानलाई कथा रचेका

सरकारी जग्गाजति व्यक्तिको नाउँमा
लुटेको कालो धन राख्छन् कुन ठाउँमा

नेतासँग मिलेर सुन तस्कर बोल्दैनन्
सुन समात्ने मेसिन किन चल्दैनन्

जग्गा सुन धुकुटी नेता मिली रित्याए
खाना अब के छ देशमा सबै सिध्याए

सत्ता जोगाई पाऊँ भन्दै विदेशीको पाउमा
राष्ट्रियता सुम्पी दिन्छु तिम्रै नाउँमा

नेतालाई गणतन्त्र जनतालाई सास्ती
देश लुटेर नेताले गरे मोजमस्ती

विद्रोहमा उठौँ जनता तिजमा एकैसाथ
देश लुट्ने देश बेच्ने नेता मुर्दावाद