काठमाडौँ । राष्ट्रिय जनमोर्चाका केन्द्रीय सल्लाहकार तथा राष्ट्रियसभा सांसद राजेश विश्वकर्मा (तुलप्रसाद) ले सुनतस्करीसम्बन्धी छानबिन आफूतिर सोझिन्छ कि भन्ने आशङ्काले गर्दा संसद् अवरुद्ध गरेको त होइन भनी प्रतिपक्षप्रति आशङ्का व्यक्त गर्नुभएको छ ।

२०८० भदौ ५ गते मङ्गलबार सम्पन्न राष्ट्रियसभाको चौधौँ अधिवेशनको सैतिसौँ बैठकमा मन्तव्य राख्दै उहाँले यस्तो आशङ्का व्यक्त गर्नुभएको हो ।

‘मलाई त शङ्का लाग्छ’ उहाँले भन्नुभयो– ‘कतै प्रमुख प्रतिपक्षी दलले छानबिन आफूतिर सोझिन्छ कि भन्ने आशङ्कासहित संसद् अवरुद्ध गरेको त होइन ?’

प्रतिपक्षी दलको उच्चस्तरीय छानबिन आयोग गठनको मागप्रति पनि उहाँले प्रश्न उठाउनुभयो ।

‘यो भन्दा पहिले कैयौँ उच्चस्तरीय छानबिन समिति वा आयोग बनेका छन्; जस्तै : मल्लिक आयोग, रायमाझी आयोग, यस्तै तस्करीसित सम्बन्धित सांसद परि थापा नेतृत्वको आयोग’ उहाँले भन्नुभयो– ‘के ती आयोगका प्रतिवेदन कार्यान्वयन भए ? दोषीलाई सजाय दिइयो ?’

उहाँले उच्चस्तरीय आयोग गठन गर्नु मात्र पर्याप्त नभएको तर्क गर्दै भन्नुभयो– ‘त्यसले तयार पारेको छानबिन प्रतिवेदन नै कार्यान्वयन नहुने हो भने यस्तो उच्चस्तरीय आयोग वा समितिको के अर्थ छ ?’

उहाँले यही विषयलाई लिएर संसद् अवरुद्ध गर्दा देशलाई नै बन्धक बनाउने काम भएको बताउँदै त्यसबाट संसद् जनताको जिम्मेवारी वहन गर्ने दायित्वबाट हटिरहेको बताउनुभयो ।

‘देश महङ्गीको चपेटामा छ । छ रुपियाँमा बिक्री नभएर सडकमा फालिएको गोलभेडा अहिले थोकबजारमै १२० रुपियाँभन्दा माथि पुगेको छ । प्याजमा भारतले ४० प्रतिशत भन्सार लगाएपछि नेपाली जनताले प्याज किन्न सक्ने अवस्थामा छैनन्’ सांसद विश्वकर्माले भन्नुभयो– ‘यस्तो बेलामा सरकारको ध्यान यतातर्फ जानुपर्दछ ।’

उहाँले संसद् अवरुद्ध हुँदा जनताका यस खालका आवाज सांसदहरूले उठाउन नपाएको विषयतर्फ सम्बन्धित पक्षको ध्यान जानुपर्ने बताउनुभयो ।

त्यसैगरी, उहाँले डेङ्गी र लम्पिस्किनले देशको स्वास्थ्यक्षेत्र गम्भीर समस्यामा परेको भन्दै यसतर्फ पनि सरकारको ध्यान जानुपर्ने बताउनुभयो ।

कोशी प्रदेशको प्रसङ्ग

फरक प्रसङ्गमा उहाँले कोशी प्रदेशमा सत्तापक्षले नै लोकतान्त्रिक मूल्यमान्यता भत्काएको बताउनुभयो ।

‘कोशी प्रदेशमा यसपटक पनि पुरानै नाटक दोहोर्‍याइयो’ उहाँले भन्नुभयो– ‘मत बराबर भएमा सभामुखले मतदान गर्ने लोकतन्त्रको सर्वसम्मत मूल्यमान्यताको कोशी प्रदेशमा धज्जी उडाइयो ।’

सांसद विश्वकर्माले जनताको लामो आन्दोलनको बलमा स्थापना भएको लोकतान्त्रिक गणतन्त्रलाई तिनकै पक्षधरले धज्जी उडाउनु चिन्ताजनक भएको बताउनुभयो ।

उहाँले यस विषयमा सम्पूर्ण लोकतन्त्रका पक्षधरहरू सजग र जिम्मेवार हुनुपर्ने आवश्यकतामा पनि जोड दिनुभयो ।