दमौली । तनहुँस्थित बन्दीपुर केबलकार असोजदेखि सञ्चालन हुने भएको छ ।
बन्दीपुर केबलकार एन्ड टुरिज्मले सो जानकारी दिएको हो ।
जिल्लाको बन्दीपुर गाउँपालिका–४ ठुल्ढुङ्गामा तल्लो स्टेसन र सोही वडाको बरालथोकसम्मको एक हजार सात सय मिटर दुरीमा केबलकार निर्माण गरेको छ ।
एसियाकै ठुलो भनिएको यहाँको सिद्धगुफा र हरियाली डाँडाको मनोरमदृश्य अवलोकन गर्दै उक्त केबलकारबाट यात्रा गर्न सकिने छ ।
केबलकारको अहिले पुन:परीक्षणको काम भइरहेको बन्दीपुर केबलकार एन्ड टुरिजमका निर्देशक तथा इन्जिनियर हरिदत्त पौडेलले जानकारी दिनुभयो ।
केबलकारमा एक्काइस डिब्बा यात्रु बोक्ने, छ डिब्बा रेष्ट्रो क्याबिन र दुई एड्भेन्चर गरी २९ वटा डिब्बा हुने छन् । एक डिब्बामा आठ जनासम्म यात्रु बस्नसक्ने क्षमताको छ ।
एड्भेञ्चर डिब्बा भने अन्य डिब्बाको तुलनामा फरक किसिमको (सिसैसिसाको र आधुनिक किसिमबाट निर्माण गरिएको) हुने उहाँले बताउनुभयो ।
‘केबलकार भित्रै सुत्न र खान पाइने व्यवस्थासहित रेष्ट्रो क्याबिनसमेत सञ्चालन गर्ने योजना रहेको छ’ निर्देशक पौडेलले भन्नुभयो ।
पृथ्वीराजमार्गमा रहेको बटम स्टेसनबाट माथि बन्दीपुर बजारमा कलेज पढ्न जाने र आउने विद्यार्थीलाई रु ५०, पत्रकारलाई रु तीन सय ५०, अन्य यात्रुका लागि रु पाँच सय, रेस्ट्रो क्याबिनको रु २५ हजार पर्ने छ भने ६५ वर्ष माथिका नागरिकलाई भने टिकटमा सहुलियत दिइने कम्पनीले जनाएको छ ।
मिति नतोकिए पनि दसैँअगाडि देखि केबलकार सञ्चालनमा ल्याउने योजना भइरहेको कम्पनीका अध्यक्ष रामचन्द्र शर्माले जानकारी दिनुभयो ।
केबलकारमा अबको करिब डेढ महिना सुरक्षाको हिसाबले पटक पटक परीक्षणका काम भइरहेको र अब असोजदेखि व्यावसायिक रूपमा सञ्चालनमा ल्याइने उहाँले बताउनुभयो । (रासस)
