दीप गोले तामाङ #

ए मूर्ख
तिमीसँग दम्भ छ, घमण्ड छ
हामीलाई नहेप सोझा मानेर
हामीलाई अशिक्षित भनेर
असक्षम भनेर
तिमीसँग शक्ति छ भनेर

हामी पनि त मान्छे हौँ नि
मान्छेले मान्छेलाई सम्मान गर्न सिक
सत्तामा बसेर तिरस्कारको नजरले
नियालिन्छ भने
खबरदार !
हाम्रो पनि त संस्कार छ
नीतिनियम छ
कानुन छ
हामीलाई पशुत्वको नजरले दृष्टिगत गरी
अभिव्यक्ति नदिनू
कानुनको कालो कोट अपमान भो यो त

संसारको इतिहास साक्षी छ
अवहेलनाले शासक कसरी ढल्छ
जनता अरिङ्गाल हो
अरिङ्गाललाई जिस्किनु मुर्खता हो
पानीमुनि गए नि छाड्दैनौँ
याद गर न्यायमा लाठीचार्ज गरी
बन्दुकको कुन्डा र बुटले ठोकिन्छ भने
न्यायमाथि कुठारात गरिन्छ भने
त्यो कुर्ची जोगाउन मुस्किल पर्ने छ
तिमी एकदिन हार्ने छौ
सत्ता जनताको पन्जामा आउने छ
तिम्रो चिहानमा विजयको झन्डा गडिने छ

अहिले
धान खाने मुसा चोट पाउने भ्यागुता भएको छ
ठोस विश्लेषण गरी
बन्द गर यो खेल जातिवादको, फासिवादको
देशलाई खरानी बनाउने खेल
तुरुन्तै कार्वाही गर
बहुसङ्ख्यक जनताको अभिमतलाई स्वीकार गर
नहेप
हामी पनि मान्छे हौँ
सम्मानको दृष्टिले व्यवहार गर
ए ! राज्यसत्ता
दमन बन्द गर ।