काठमाडौं । रवि लामिछाने नेतृत्वको राष्ट्रिय स्वतन्त्र पार्टीले गर्ने गरेका प्रचारमुखी गतिविधि लगातार विवादमा आउने गरेका छन् । पछिल्लो समय नारायणगढ–मुग्लिन सडकखण्डमा निरन्तर झरिरहने पहिरोका कारण हुने जाम खुलाउन भन्दै रास्वपाका कार्यकर्ताहरु वाकिटकीसहित हिँडेपछि फेरि विवाद भएको छ।
जाममा परेका सवारी साधनका लागि ट्राफिक व्यवस्थापन गर्न भन्दै रास्वपाको एक टोली वाकिटकी र विशेष पोशाकसहित परिचालन भएको थियो ।
तर, उनीहरुले प्रयोग गरेको सञ्चार साधन वाकिटकी प्रशासनको अनुमति नलिएरै प्रयोग गरेको भेटिएपछि प्रशासनले छानबिन सुरु गरेको छ । चितवनका प्रमुख जिल्ला अधिकारी सुरेन्द्र पौडेलले प्रशासनको अनुमतिबिना प्रयोग भएका ती सञ्चारसाधनबारे छानबिन गर्न प्रहरीलाई निर्देशन दिएका छन्।
पौडेलले रास्वपाका कार्यकर्ताले सञ्चारका लागि प्रयोग गरेको वाकिटकी स्वीकृति लिइएको तथा दर्तावाला भए नभएको छानबिन गर्न प्रहरीलाई निर्देशन दिएको बुधबार विज्ञप्तिमार्फत बताएका छन्।
जिल्ला प्रशासनले जाम खुलाउने नाममा रास्वपाले चालेको कदमप्रति आपत्ति जनाउँदै राजमार्गको पहिरो, ट्राफिक जामजस्ता कुराको व्यवस्थापन गर्न सुरक्षा निकायसहित राज्यका अंग नै सक्षम रहेको जनाएको छ ।
‘ठूला विपदका घटनाहरुमा राजनीतिक दल, नागरिक समाज लगायत आमसर्वसाधारण नागरिकबाट कुनै अमुक दल तथा सोअन्तर्गतका संगठनको सहयोग नलिइएको, लिन स्वीकृति नदिइएको व्योहोरा यसै सूचनाद्वारा जानकारी गराउँछौँ,’ प्रमुख जिल्ला अधिकारी पौडेलले भनेका छन्, ‘विपद्का यस्ता घटनाको राहत, उद्धार र व्यवस्थापन गर्न सुरक्षा निकायलगायत राज्यका अंगहरू नै सक्षम छन्।’
यसअघि रास्वपाले चितवनमा मोबाइल क्लिनिक सन्चालन गर्ने भन्दै भरतपुर मेडिकल कलेजको एम्बुलेन्सको रङ परिवर्तन गरेर चलाएपछि विवादमा तानिएको थियो । विवादपछि रास्वपाले ना २ ख ५६१९ नम्बरको एम्बुलेन्स पुरानो मेडिकल कलेज भरतपुरलाई नै फिर्ता गरेको छ ।
गैरकानूनी रुपमा रंग परिवर्तन गरेको र ‘एम्बुलेन्स’ लेखेको मेटाएर ‘मोबाइल क्लिनिक’ लेखेको भन्दै यो विषय विवादमा परेको थियो ।
रास्वपाले महिलाहरुका लागि निःशुल्क सन्चालनमा ल्याएको बस पनि अनुमति नलिई निलो रंगमा परिवर्तन गरेको पाइएको यातायात कार्यालय भरतपुरले जनाएको छ ।
