काठमाडौँ । अखिल नेपाल जनजाति सम्मेलनले केन्द्रीय सदस्य रामबहादुर पुनको निधनप्रति भावपूर्ण श्रद्धाञ्जली व्यक्त गरेको छ ।
कार्यवाहक अध्यक्ष अमरध्वज रानाको हस्ताक्षरमा २०८० साउन २२ गते सोमबार शोकवक्तव्य जारी गर्दै सम्मेलनले स्मृतिशेष पुनप्रति श्रद्धाञ्जलीका साथ शोकसन्तप्त परिवारप्रति समवेदना प्रकट गरेको हो ।
वक्तव्यमा स्मृतिशेष पुनको पारिवारिक पृष्ठभूमि, सङ्गठनमा भूमिकाको संक्षिप्त चर्चा गर्दै उहाँको निधनबाट सङ्गठनले निडर, इमानदार, निष्ठावान् र विचारमा स्पष्ट व्यक्तित्व गुमाएको उल्लेख छ ।
यस्तो छ, वक्तव्यको पूर्ण पाठ :
“हाम्रो सङ्गठन अखिल नेपाल जनजाति सम्मेलनका केन्द्रीय सदस्य रामबहादुर पुनको हिजो २०८० साउन २१ गते आइतबारका दिन राति ११ बजे चितवन मेडिकल कलेजमा मुटु, कलेजोसम्बन्धी ‘थेओ’ भन्ने स्वास्थ्य समस्याले रक्तसञ्चार हुन नसकेका कारण असामयिक निधन भएको छ । अखिल नेपाल जनजाति सम्मेलन स्मृतिशेष रामबहादुर पुनप्रति भावपूर्ण श्रद्धाञ्जली व्यक्त गर्दै शोकसन्तप्त परिवारजनप्रति धैर्यधारण गर्न आग्रहसहित समवेदना प्रकट गर्दछ ।
बागलुङ जिल्ला, काठेखोला गाउँपालिका वडा नम्बर ८ लेखानी घर भई हाल रुपन्देही जिल्ला तिलोत्तमा नगरपालिका वडा नम्बर ९ मङ्गलापुरमा बसोबास गर्दै आउनुभएका पुन बुबा कर्णबहादुर पुन र आमा तुलसी पुनको कोखबाट २०१४ भदौ १० गते तीन दाजुभाइमध्ये माहिलो छोरोको रूपमा जन्मनुभएको थियो । पुनको परिवारमा पत्नी, दुई छोरा सोमबहादुर पुन, अनुबहादुर पुन तथा एक छोरी गीता हुनुहुन्छ ।
स्मृतिशेष पुनमा मुटु, कलेजो, प्रेसर, सुगरसम्बधी स्वास्थ्य समस्या पनि थिए । पछिल्लोपटक ढाडको समस्या देखिएपछि उहाँ गत असारमा काठमाडौँ कुपण्डोलस्थित मेदान्त अस्पतालमा एक हप्ता फिजियोथेरापी गरेर सन्चो भएर बुटवल फर्कनुभएको थियो ।
फेरि स्वास्थ्यमा समस्या देखिएका कारण क्यान्सर रोगको आशङ्कामा भरतपुर क्यान्सर हास्पिटलमा जचाउनु भएको थियो । स्वास्थ्य परीक्षणमा केही समस्या नदेखिएपछि त्यहाँबाट डिस्चार्ज हुनुभयो तर फेरि स्वाथ्यमा समस्या देखा परेपछि उहाँ चितवन मेडिकल कलेजको आई।सी।यू। मा भर्ना भएर उपचार गराई रहनुभएको थियो । चिकित्सा शब्दावलीमा ‘थेओ’ भन्ने समस्याका कारण रोग प्रतिरोधात्मक क्षमता कम हुन गई शरीरमा रक्तसञ्चार हुन नसकेपछि २०८० साउन २१ गते आइतबार राति ११ बजे उहाँको असामयिक निधन भएको थियो ।
रोजगारीको सिलसिलामा भारतको चन्डिगढ पुग्नुभएका स्मृतिशेष पुन मूल प्रवाह अखिल भारत नेपाली एकता समाजमा आबद्ध हुनुभएको थियो । भारतमा अखिल नेपाल जनजाति सम्मेलनको सङ्गठन रहँदा उहाँ त्यसको भारतशाखा उपाध्यक्षसमेत रहिसक्नुभएको थियो । स्वदेश फर्किसकेपछि पनि उहाँ सङ्गठित नभइरहन सक्नुभएन । २०७५ साल माघ महिनामा इटहरीमा सम्पन्न अखिल नेपाल जनजाति सम्मेलनको चौथो राष्ट्रिय महाधिवेशनबाट केन्द्रीय सदस्यमा निर्वाचित पुनले गण्डकी प्रदेश समितिको संयोजक, बाग्लुङ जिल्लाको इन्चार्ज तथा जनजाति सम्मेलन केन्द्रीय खेलकुद विभागको सदस्यसमेतको जिम्मेवारी बहन गर्नुभएको थियो ।
स्मृतिशेष पुनको असामयिक निधनले हाम्रो सङ्गठनलाई ठुलो क्षति पुगेको छ । उहाँ सङ्गठनमा निडर, इमानदार, निष्ठावान् र विचारमा स्पष्ट हुनुहुन्थ्यो ।
पुनको निधनप्रति केन्द्रीय समितिको तर्फबाट पुन: भावपूर्ण हार्दिक श्रद्धाञ्जली व्यक्त गर्दै शोकसन्तप्त परिवारजनमा समवेदना प्रकट गर्दछौँ ।”
