विष्णु शर्मा ##
तिम्रा सिर्जना अपार छन्
सुन्दर र स्वच्छ छन् तिम्रा मन ।
तर समाजले तिम्लाइ हेला गर्छ
तिमी रोकियौ भने बल्ल फेला पर्छ ।।
तिमीलाई अछुतमा गनिन्छ
तिमीलाई दलित भनिन्छ ।
तर तिम्रै हातले संसार सिगारिन्छ
त्यही समाजले नाम बिगारिदिन्छ ।।
समाज धर्म गर्छौं भन्छ
जसको मिहिनेतले संसार सुन्दर बन्छ ।
उसैलाई फेरि अपमान गर्छ
थाहा छैन त्यो कुन धर्ममा पर्छ ?
मानवलाई हेला गर्न कुन धर्मले भन्छ ?
कुकुर र बिराला चुलामा, कुन धर्मले दिन्छ ?
त्यसैले त समाज कता कता मिलेको छैन
मान्छेले नै मान्छेलाई चिनेको छैन ।।
सदियौँदेखि मानिस मानिसमा विभेद छ
एकार्काको घरमा जान निषेध छ ।
यो गहिरो खाडल पुर्नु नै पर्छ
समाजका सबैले यो कुरा बुझ्नुपर्छ ।
कानुनले सबै समान भनेको छ
व्यावहारिकताको उद्घोष गरेको छ
कानुनका ठेकदारबाट नै उल्लङ्घन हुन्छ
अनि समाज कसरी परिवर्तन हुन पुग्छ ?
यो विभेदले गहिरो जरा गाडेको छ
समाजमा एकार्कोलाई भाँडेको छ ।
सानो जातको हीनताबोधले काम गरेको छ
त्यसैले त यो वर्ग पछाडि परेको छ ।।
राम्रा कामले हेला होइन सम्मान पाउनुपर्छ
सबै मानिसमा प्रफुल्लता छाउनुपर्छ ।
राम्रा काम गर्नेले यो कुरा सोच्नुपर्छ
मागेर सम्मान नपाए खोस्नुपर्छ ।।
बौद्धिकता आफ्नो लागि मान्नुपर्छ
मानसिकता फराकिलो पार्नुपर्छ ।
वर्गीय लडाइँमा सामेल हुनुपर्छ
थाक्दै नथाकी गन्तव्यमा पुग्नुपर्छ ।
शोषकको किल्ला हल्लाउनुपर्छ
विभेदको पर्खाल ढलाउनुपर्छ ।
सिर्जनशील बर्गले सत्ता समाउनुपर्छ
गरिखाने वर्ग त्यसमै रमाउनुपर्छ ।।
