गोपालप्रसाद भट्टराई, सन्धिखर्क ।
अर्घाखाँचीको भूमिकास्थान–१० गच्छे भालुबाङमा राष्ट्रिय जनमोर्चाले वृक्षरोपण गरेको छ ।
२०८० साउन २० गते राजमो वडा समितिको आयोजनामा गच्छे–भालुबाङ सडकको धनचौर खण्डको सडकछेउमा वृक्षरोपण गरिएको हो ।
राजमो केन्द्रीय सदस्य तथा भूमिकास्थान नगर प्रमुख झबिलाल थापा र जिल्ला सचिव बाबुराम पन्थीको विशेष उपस्थितिमा धनचौर स्वास्थ्यचौकीछेउबाट सुरु गरी लिसेकुनासम्मको सडकछेउमा बिरुवा रोपिएको राजमो भूमिकास्थान–१० का सचिव भीमलाल भुसालले जानकारी दिनुभयो ।
वृक्षरोपण कार्यक्रमको सुरुआत गर्दै भुमिकास्थान नगर प्रमुख झविलाल थापाले मोटरबाटो खन्दा वातावरणीय पक्षलाई जोगाउन नसक्दा हुने नोक्सानीलाई परिपूर्ति गर्न वृक्षरोपणले सहयोग पुग्ने विश्वास व्यक्त गर्नुभएको थियो ।
उहाँले वातावरण संरक्षण र पैदलयात्रीलाई शीतल दिने गरी सडकछेउमा बिरुवा रोप्ने र हरियाली सडक नामकरण गर्ने नगरपालिकाको सोचअनुसार राजमो धनचौरले गरेको वृक्षारोपण कार्यको प्रशंसासमेत गर्नुभयो ।
सो अवसरमा प्रगतिशील लेखक सङ्घ लुम्बिनी प्रदेश सदस्य तिलकराम भट्टराई, अखिल (छैठौं) अर्घाखाँचीका पूर्व उपाध्यक्ष शिव बेल्वासे, राजमोका ज्येष्ठ सदस्य दण्डपाणि गैरे, वीरबहादुर खत्री, भागिरथा गैरेलगायत राजमो धनचौरका नेता तथा कार्यकर्ताको सहभागितामा सम्पन्न कार्यक्रममा बोल्दै राजमो जिल्ला सचिव बाबुराम पन्थीले सडकछेउमा वृक्षरोपण गर्दा वातावरण सुधार्न सहयोग पुगेको बताउनुभयो ।
कार्यक्रमअन्तर्गत वातावरणीय सन्तुलनमा टेवा पुगोस भन्ने हेतुले मोटरबाटोको छेउमा लाँकुरी, टुनी र आँप गरी करिब दुई सय बिरुवा रोपिएको थियो ।
