स्टकहोम । स्टकहोममा इरिट्रियन सांस्कृतिक महोत्सवमा बिहीबार हिंसात्मक झडप हुँदा कम्तीमा १०० जनालाई पक्राउ गरिएको स्थानीय अधिकारीहरूले बताएका छन् ।
घाइतेमध्ये आठ जनाको अवस्था गम्भीर रहेको बताइएको छ । घाइतेहरूलाई अस्पताल लगिएको छ । झडपमा तीन प्रहरी अधिकारी पनि घाइते भएको स्विडेनी प्रसारक एसभिटीले उल्लेख गरेको छ ।
करिब एक हजार इरिट्रियन सरकार विरोधी प्रदर्शनकारीले उत्सव कार्यक्रममा आक्रमण गरेको र प्रहरी अधिकारीमाथि ढुङ्गा प्रहार गरेको स्विडेनी सञ्चार माध्यमले जनाएको छ ।
तीन दसकअघि इथियोपियाबाट स्वतन्त्रता प्राप्त गरेको अफ्रिकी देशको सांस्कृतिक सम्पदालाई चिनाउन सन् १९९० को दसकदेखि इरिट्रिया–थिम्ड फेस्टिभल आयोजना गरिदै आएको छ । हाल हजारौँ इरिट्रियन मूलका मानिस स्विडेनमा बसोबास गरिरहेका छन् ।
प्रहरीले भने हिंसात्मक दङ्गा, आगजनी र आपतकालीन सेवाको तोडफोडका बारेमा अनुसन्धान सुरु गरिएको जनाएको छ । (रासस–सिन्ह्वा)
