गोपालप्रसाद भट्टराई, सन्धिखर्क ।
राष्ट्रिय जनमोर्चा लुम्बिनी प्रदेश अध्यक्ष बोमबहादुर खत्रीले मुलुकको राष्ट्रियता अत्यन्तै कठिन मोडमा पुगेको बताउनुभएको छ । उहाँले भन्नुभयो– ‘देशभित्रका ठुला भनाउँदा दल भ्रष्टाचारमा लिप्त हुँदा बैदेसिक हस्तक्षेपसमेत बढेर गएको, त्यसका कारण राष्ट्रियता कठिन मोडमा पुगेको छ’ ।
राष्ट्रिय जनमोर्चाले सञ्चालन गरेको ऐतिहासिक तीन अभियानअन्तर्गत बिहीबार अर्घाखाँचीको भूमिकास्थान नगर समितिले पोखेडाँडामा आयोजना गरेको अगुवा कार्यकर्ता भेलालाई सम्बोधन गर्दै राजमो प्रदेश अध्यक्ष खत्रीले यस्तो अभिव्यक्ति दिनुभएको हो ।
भारतको एकतर्फी हस्तक्षेपसँगै अहिले नेपालमा अमेरिकी रवाफसमेत बढ्दा सरकार र सत्तासिन दललाई उनीहरूका विरुद्ध बोल्ने साहस र फुर्सद नभएको उहाँको दाबी थियो ।
उहाँले भन्नुभयो– ‘एमसिसी, एसपिपी जस्ता कार्यक्रमको माध्यमबाट नेपालमा गतिविधि बढाएको अमेरिकाले आफ्नो साम्राज्य जमाउन रवि लामिछानेलाई प्रयोग गरी स्वतन्त्र नामको पार्टी सञ्चालन गरेको पुष्टी भइसकेको छ र अझै धेरै खुल्दै जाने छ ।’
पछिल्लो सुनकाण्डसँगै काङ्ग्रेस, एमाले र माओवादी तीनओटै दललाई भ्रष्टाचारमा क्षेत्र तथा भाग पुगेको भन्दै अध्यक्ष खत्रीले व्यङ्ग्य गर्नुभएको छ ।
भूमिकास्थानका दसओटै वडाबाट अगुवा कार्यकर्ताको उल्लेख्य सहभागिता रहेको भेलामा राष्ट्रिय जनमोर्चाका नेता शेरबहादुर बिसी, केन्द्रीय सदस्यद्वय सागर केसी र झबिलाल थापा, अखिल नेपाल सङ्घकी महासचिव शकुन्तला राना, राजमो जिल्ला अध्यक्ष थम्मन केसी, सचिव बाबुराम पन्थीलगायतले सम्बोधन गर्नुभएको थियो ।
भेलालाई सम्बोधन गर्दै उहाँहरूले एकातिर प्रतिगामी र अर्कातिर साम्राज्यवादी खतरा बढेर गएकाले दुबै शक्ति विरुद्ध लड्नुपर्नेमा जोड दिनुभएको थियो ।
टेकबहादुर थापाको अध्यक्षता, खड्कबहादुर थापाको स्वागत मन्तव्य र गोपाल पौडेलको सञ्चालनमा सम्पन्न उक्त भेलाले कम्युनिस्ट आन्दोलन र मुलुकका उपलब्धिलाई रक्षा गर्दै अर्को व्यवस्थाको निम्ति सङ्घर्ष गर्ने गरी सङ्गठनलाई अगाडि बढाउने सङ्कल्प गरेको सहभागीले बताएका छन् ।
